ސްޓޭޓް ބޭންކް އޮފް އިންޑިއާ (އެސްބީއައި) އަށް ދިވެހި ސަރުކާރުން ވިއްކި ޓީ ބިލުގެ ތެރެއިން، މި މަހު ދައްކަންޖެހޭ 50 މިލިއަން ޑޮލަރު އަނބުރާ ދެއްކުން ރާއްޖޭން އެދިގެން އިންޑިއާ އިން އަނެއްކާ ވެސް ފަސްކޮށްދީފި އެވެ.

އެސްބީއައިއިން ގަތް ޓީބިލަކީ ކުރީ ސަރުކާރާއި އިންޑިއާ ސަރުކާރާ ދެމެދު 2019 ގައި ވެވުނު އެއްބަސްވުމެއްގެ ދަށުން ބަޖެޓު ސަޕޯޓު ހޯދަން ވިއްކި 200 މިލިއަން ޑޮލަރުގެ ޓީބިލުތަކެކެވެ. އެސްބީއައިއިން މި ޓީބިލުތައް ގަތީ ފަހަރަކު 50 މިލިއަން ޑޮލަރު މަގުންނެވެ.

މި ފައިސާ ދެއްކުން އިންޑިއާއިން އަހަރަކަށް ފަސްކޮށްދިނީ މިދިޔަ އަހަރުގެ މޭ މަހުގެ ތެރޭގައި، އޭރުގެ ފޮރިން މިނިސްޓަރު މޫސާ ޒަމީރު އިންޑިއާއަށް ކުރެއްވި ދަތުރުގެ ތެރެއިންނެވެ. އޭގެ ކުރިން މި ސަރުކާރުން ވަނީ މީގެ ތެރެއިން 50 މިލިއަން ޑޮލަރު، މިދިޔަ އަހަރުގެ ޖެނުއަރީގައި ދައްކާފަ އެވެ. މިހާރު ބާކީ ނުދައްކާ ވަނީ 150 މިލިއަން ޑޮލަރެވެ.

ރާއްޖެއަށް ކުރިމަތިވެފައިވާ މާލީ އުދަނގޫ ހާލަތުގެ ސަބަބުން ދިވެހި ސަރުކާރުން އިންޑިއާއަށް ދައްކަންޖެހޭ ލޯންތައް ދެއްކުމުގައި އިންޑިއާ އިން ދަނީ ވަރަށް ގިނަ ލުއިތައްދީ ރާއްޖެއަށް އެހީވަމުންނެވެ. އަދި އޭގެ މުގާބިލުގައި ސަރުކާރުން އަންނަނީ އިންޑިއާއާއިއެކު ސިއްރު އެތައް އެއްބަސްވުމެއްގައި ސޮއިކުރަމުން ނެވެ.

މިއަދު މުއިއްޒު ސަރުކާރު ސިފަވަނީ މޯދީގެ ގޮނޑިކޮއްކޮ ސަރުކާރެއްގެ ގޮތުގައި އެވެ.