ކުރީސަރުކާރު ކިޔުމުގެ ބަދަލުގައި މިސަރުކާރުން ކޮށްދެވުނު ކަމަކީ ކޮބައިތޯ ބަލާލަން ޖެހޭ ކަމުގައި ރައީސް އަބްދުﷲ ޔާމީން އަބްދުލް ޤައްޔޫމް ވިދާޅުވެއްޖެއެވެ.

ޕީއެންއެފް ފްރޮންޓް އޮފީސް ޖަލްސާގައި ވާހަކަފުޅު ދައްކަވަމުން އެމަނިކުފާނު ވިދާޅުވީ މިސަރުކާރަކީ ރައްޔިތުންގެ އިހުސާސްތައް ދަނެ ރައްޔިތުންނަށް ކަންތައްތައް ރަނގަޅު ކުރުމަށް އައި ސަރުކާރަކަށް ވާއިރު މި ސަރުކާރުން ރައްޔިތުންނަށް ކޮށްދެވުނީ ކޮން ކަމެއް ތޯ ސުވާލު އުފައްދަން ޖެހޭ ކަމަށެވެ.

އެންމެ މުހިންމު ކަމަކަށް ބަލާއިރު، ސިއްހީ ދާއިރާއިން ރައްޔިތުންނަށް ލިބެން ޖެހޭ އެއްވެސް ހައްގެއް މިއަދު އެއްވެސް ދިވެހި ރައްޔިތަކަށް ނުލިބޭ ކަމުގައި ވެސް އެމަނިކުފާނު ވަނީ ވިދާޅުވެފައެވެ.

ރަނގަޅު ހިދުމަތެއް ހޮސްޕިޓަލުތަކުން ނުދެވޭ އިރު މިއަދު އާސަންދައިން ބޭސް ސިޓީތަކަށް ބޭސް ނުލިބުމާއި ރައްޔިތުންނަށް ހިދުމަތް ދޭނޭ ރަނގަޅު ޑޮކްޓަރުން ތަމްރީނު ނުކުރެވޭ ކަމަކީ ވެސް މިއަދު ކަންބޮޑުވާން ޖެހޭ ކަމެކަމުގައި އެމަނިކުފާނު ވަނީ ވިދާޅުވެފައެވެ.

ރަށް ރަށުގައި ތިއްބެވި ރައްޔިތުންނަށް ލިބެންޖެހޭ ބޭސްފަރުވާގެ ހައްގު އެންމެ ފުރިހަމަ ގޮތުގައި ލިބެން ޖެހޭނެ ކަމަށާއި އަދި މިކަންތައް ތަކަކީ ހަމައެކަނި މާލޭގައި އޮންނަން ޖެހޭ ކަމެއް ނޫން ކަމުގައި ވެސް އެމަނިކުފާނު ވަނީ ވިދާޅުވެފައެވެ.

ދިވެހި ރައްޔިތުންނަށް ލިބެމުން ދިޔަ ހިލޭ ބޭސްފަރުވާ ރައްޔިތުންނަށް މިއަދުވެސް ލިބެން ޖެހޭ ކަމަށާ އެހެން ކަމުން މިސަރުކާރުން ކޮށްދެވުނީ ކޮން ކަމެއްތޯ ވިސްނާލަން ވަރަށް މުހިންމު ކަމުގައި އެމަނިކުފާނު ވަނީ ވިދާޅުވެފައެވެ.