މާލެ ސަރަހައްދުގައި ބޮޑު އާބާދީއެއް ދިރިއުޅެމުންދާ ހުޅުމާލޭގައި ހުރި ސަރުކާރު ހޮސްޕިޓަލު ޓާޝަރީ ފެންވަރަށް ބަދަލުކޮށް ރައީސް ޑރ މުހައްމަދު މުއިއްޒުގެ ސަރުކާރުން ހުޅުވިތާ 6 މަސް ދުވަސް ފާއިތުވެގެން ދިޔައިރުވެސް ރައްޔިތުންނަށް ބޭނުންވާ ސްޕެޝަލިސްޓު ޑޮކްޓަރުން އަދިވެސް ހަމަނުވާކަން ހާމަވެއްޖެއެވެ.

އެގޮތުން އާންމު ރައްޔިތުން އެ ހޮސްޕިޓަލަށް މީގެ ހަމަސް ކުރިން ކުޑަކަމުދާ ނިޒާމުގެ ބަލިތަކަށް ޚާއްސަ ޑޮކަޓަރަކު ހުރިތޯ އޮޅުން ފިލުވަން ގުޅުމުން މައުލޫމާތު ދީފައިވަނީ އޭރު އަދި އެ ދާއިރާއަށް ޚައްސަ ޑޮކްޓަރެއް އެ ހޮސްޕިޓަލުގައި ނުބައްލަވާ ކަމަށެވެ.

އޭގެ ހަމަސް ފަހުން އަނެއްކާވެސް އެ ދާއިރާއިން ޚާއްސަ ޑޮކްޓަރަކު ހުރިތޯ އޮޅުން ފިލުވަން އާންމު ރައްޔިތަކު ބުރާސްފަތި ދުވަހު ހުޅުމާލޭ ހޮސްޕިޓަލަށް ގޮސް މައުލޫމާތު ސާފުކުރުމުން ހާމަވީ އަދިވެސް އެ ހޮސްޕިޓަލުގައި ކުޑަކަމުދާ ނިޒާމުގެ ބަލިތަކަށް ޚާއްސަ ޑޮކްޓަރެއް ނެތް ކަމަށެވެ.

މިކަމާ ގުޅިގެން ހެލްތު މިނިސްޓްރީގެ މީޑިޔާއަށް ގުޅާލުމުން ފޯނު ނުނަންގަވާތީ އެ މިނިސްޓްރީގެ ބަހެއް ވަނީ ލިބޭ ގޮތް ނުވެފައެވެ.

ހުޅުމާލެ ހޮސްޕިޓަލުގައި އަލަށް ތަޢާރަފްކުރެވޭ ޚިދުމަތްތަކާއެކު، ޓަރޝަރީ ފެންވަރަށް ޚިދުމަތްދޭ ހޮސްޕިޓަލެއްގެ ގޮތުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ހުޅުވާދެއްވީ 16 ނޮވެމްބަރ 2024 އެވެ.