ކަމެއް ކުރަން ނޭގެންޏާ އެންމެ ކުޑަމިނުން ކޮށްފައޮތް ކަމެއް ދެމެހެއްޓޭތޯ ބަލަން ވާނެކަމުގައި ރައިސް އަބްދުﷲ ޔާމީން އަބްދުލް ޤައްޔޫމް ވިދާޅުވެއްޖެ އެވެ.

ރޭ ޕީއެންއެފްގެ ފްރޮްންޓް އޮފީސް ޖަލްސާގައި ވާހަކަދައްކަވަމުން އެމަނިކުފާނު ވިދާޅުވީ، ރައްޔިތުންގެ ފައިސާއިން ހަރަދު ކޮއްގެން ރައްޔިތުންނަށް ޓަކައި ތަމްރީނު ކޮށްގެން ގެނައި ޑޮކްޓަރުންގެ ބޮންޑު އުވާލުމަކީ ކޮއްގެން ވާނެ ކަމެއް ނޫން ކަމަަށެވެ.

ދިވެރައްޔިތުންގެ ފައިސާގައި ރާއްޖެއިން ބޭރުން މި ޑޮކްޓަރުން ތަމްރީނު ކޮއްގެން ގެނައީ ރާއްޖޭގެ އެކި ހިސާބުތަކަށް ފޮނުވަން ކަމުގައިވެސް އެމަނިކުފާނު ވަނީ ވިދާާޅުވެފަ އެވެ.

ސަރުކާރުން ތަމްރީނު ކުރި މި 67 ޑޮކްޓަރުން ގެ ތެރެއިން މިވަގުތު ތިބީ އެންމެ 10 ޑޮކްޓަރުން ކަމުގައިވެސް އެމަނިކުފާނުވަނީ ވިދާޅުވެފަ އެވެ.

ދިވެހި ރާއްޖޭގެ ހުރިހާ ހިސާބެއްގައި އެންމެ ރަނގަޅު ފެންވަރުގައި ސިއްހީ ހިދުމަތްލިބުމާއި، ރަނގަޅު ޑޮކްޓަރުން ތިބުމަކީ ދިވެހި ހުރިހާ ރައްޔިތުން މިއަދު ބޭނުން ވާކަމަކަށް ވާއިރު ޑޮކްޓަރުންނަށް އިހުމާލު ވުމަކީ ރައްޔިތުން ނާއި ދޭތެރޭ ނާއިންސާފު ވުން ކަމުގައި ބެލެވޭނެ ކަމަށް ރައީސް ޔާމީން ވިދާޅުވި އެވެ.