ސަރުކާރު ހިންގާ ޕާޓީއަށް މަޖިލީހުގެ މެޖޯރިޓީ ހޯދުމުގެ މަގްސަދުގައި އިންޑީއާ ސިފައިން ބޭލުމާ އެކަމާ ޖާމިނުކޮށްފިއެވެ.

އައްޑޫ ސިޓީގެ ދާއިރާތަކަށް ރައީސް ޑރ. މުހައްމަދު މުއިއްޒު ކުރައްވަމުން ގެންދަވާ ދަތުރުފުޅުގެ ތެރެއިން ހުޅުމީދޫގައި ބޭއްވި ބައްދަލުވުމެއްގައި ރައީސް މުއިއްޒު ވަނީ، އިންޑިއާ ސިފައިން ބާލަން ދެ ގައުމުން އެއްބަސްވުމެއްގައި ސޮއިކޮށްފައިވާ ކަމަށާއި އެހެން ނަމަވެސް ސިފައިން ފޮނުވައިލުމުގެ ކަންތައް ނިންމުމަށްޓަކައި މަޖިލީހުގެ މެޖޯރިޓީ ސަރުކާރަށް ބޭނުންވާ ކަމަށް ވިދާޅުވެފައެވެ.

އެ އެއްބަސްވުމަށް އިންޑިއާގެ ސަރުކާރުން ވެސް އަމަލުކުރާނެ ކަމުގެ ޔަގީންކަން ދީފައިވާ ކަމަށް ވިދާޅުވުމަށް ފަހު ރައީސް ވަނީ މަޖިލިސް އިންތިހާބުގެ ނަތީޖާ ނުކުންނަ ގޮތަކުން އަނެއްކާ ވެސް އިންޑިއާ ސިފައިން ތިބޭނެ ފަދަ މޭރުމަކުން ވާހަކަ ދައްކަވާފަ އެވެ. އަދި, މަޖިލިސް އިންތިހާބުގައި ވިސްނުމަށް ފަހު ވޯޓު ދެއްވުމަށް އެދިވަޑައިގެންނެވިއެވެ.

މީގެ އިތުރުން މިދިޔަ ސަރުކާރުގައި ރާއްޖޭގެ ކަނޑުގެ ސަރަހައްދުން ބައެއް ގެއްލުވާލާފައިވާ ކަމަށް ބުނާ މައްސަލަ ހައްލުކުރަން މި ސަރުކާރުން ކުރާ މަސައްކަތްތައް ވެސް ނިންމޭނީ، ރައީސް ވިދާޅުވި ގޮތުގައި، މަޖިލީހުގެ ފުރިހަމަ އެއްބާރުލުން ލިބިގެންނެވެ.

ރައީސް ވިދާޅުވީ މިއީ އަޅުގަނޑުމެންގެ ތެރޭގައި ހުރި އެކި ކަހަލަ މަސްލަހަތުތަކަށް ވުރެ ގައުމީ މަސްލަހަތު އިސްކުރަން ޖެހޭ ވަގުތު ކަމަށެވެ. އެގޮތަށް އެކަން ނުކޮށްފި ނަމަ، ގައުމިއްޔަތު ވެސް ބީވެގެން ހިނގައިދާނެ ކަމަށް ވިދާޅުވިއެވެ.

ރައީސް މިހެން ވިދާޅުވިއިރު އިންޑިއާ ސިފައިން ރާއްޖެއަށް ގެނައީ މަޖިލީހުގެ އެއްވެސް ދައުރެއް ނެތި އެވެ. އަދި, މި ސަރުކާރު ވެރިކަމާ ހަވާލުވުމަށް ފަހު ސިފައިން ފޮނުވާލުމަށް ކުރަމުންދާ މަސައްކަތުގައި ވެސް މަޖިލީހުގެ އެއްވެސް ބައިވެރިވުމެއް ނެތެވެ.

އަންނަ މެއި މަހުގެ 10 ގެ ކުރިން އިންޑިއާގެ ސިފައިން ރާއްޖެއިން ބޭލުމަށްފަހު ޑޯނިއާ އާއި ދެ ހެލިކޮޕްޓަރު އޮޕަރޭޓު ކުރަން "ޓެކްނިކަލް" މީހުން ގެންނަން ދިވެހި ސަރުކާރާއެކު އިންޑިއާއިން ވަނީ އެއްބަސްވެފަ އެވެ.

ދިވެހި ހާރިޖިއްޔާއިން ނެރުނު ބަޔާނެއްގައި ބުނެފައިވަނީ ދެ ގައުމުގެ ކޯ ގްރޫޕްގެ ބައްދަލުވުމުގައި އިންޑިއާ ސިފައިންގެ ފުރަތަމަ ބެޗު މާޗް 10، ގެ ކުރިން ފޮނުވާލަން އެއްބަސްވެފައިވާ ކަމަށް ހާމަކޮށްފަ އެވެ.