ދެކުނުގެ އަތޮޅުތަކަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ކުރައްވަމުްނ ގެންދަވާ ދަތުރުފުޅުގެ ތެރެއިން ފުވައްމުލައް ސިޓީއަށް ވަޑައިގެންނެވުމުން ރައީސް އަބްދުﷲ ޔާމީންގެ ނަފުޅާ އެކު ފިޔާތޮށި ކުލައިގެ ގޮނޑި ނެރެ މަރުހަބާ ދަންނަވައިފިއެވެ.

ރައީސް ޔާމީންގެ ޕާޓީ އުފެއްދެވުމުގައި އިސްކޮށް ހަރަކާތްތތެރިވެވަޑައިގަންނަވާ މުހައްމަދު މަލީހު ޖަމާލު ކުރެއްވި އެކސް ޕޯސްޓެއްގައި ވިދާޅުވީ، ފުވައްމުލަކުން ރައީސް ޑރ. މުއިއްޒަށް ރައީސް ޔާމީންގެ ހުސްގޮނޑި ދައްކާލައިފި ކަމަށާހުސް ގޮނޑީގެ ބާރު އަދި ރައީސް މުއިއްޒުއަށް އިތުރަށް ފެނިގެން ދާނެ ކަމަށެވެ.

މީގެ އިތުރުން ޗެނަލް13އަށް މައުލޫމާތު ލިބިފައިވާ ގޮތުގައި ރައީސް މުއިއްޒުއަށް މަރުހަބާ ކިޔުމަށް ފުވައްމުލަކުން ނުކުތީ ސަރުކާރު ކުންފުނިތަކުގެ މުވައްޒަފުންނާ ސަރުކާރު އިދާރާތަކުގެ މުވައްޒަފުން އެކަންޏެވެ. ނަމަވެސް ފުވައްމުލަކަކީ ރިޔާސީ އިންތިހާޞުގެ ތެރޭގައި ރައީސް މުއިއްޒުއަށް އެންމެ ހޫނު މަރުހަބާ ކީ ސިޓީތަކުގެ ތެރެއިން ސިޓީއެއްކަން ފާހަގަކޮށްލެވެއެވެ.

އެހެންކަމުން މިހާރު ފެންނަމުން މިދާ މަންޒަރުތަކުން ދޭހަވަނީ ރައްޔިތުން ސަރުކާރު މަތިން އުއްމީދު ގެއްލި މާޔޫސްވެއްޖެ ކަން ކަމަށެވެ. ރައީށް މުއިއްޒު އައްޑޫ ސިޓީއަށް ވަޑައިގަތުމުން ހިތަދޫ ދާއިރާ ރައްޔިތުންވެސް ވްަނީ އެމަނިކުފާނުގެ ބައްދަލުވމުން ބޮއިކޮޓުކޮށްފައެވެ.

ރައީސް ޔާމީން މިނިވަންކުރުމަކީ ރައީސް މުއިއްޒުގެ އެންމެ ބޮޑު ރިޔާސީ ވައުދަށްވާއިރު ގިނަ ރައްޔިތުން ރައީސް މުއިއްޒަށް ވޯޓު ދިނީ ރައީސް ޔާމީން މިނިވަންކުރުމުގެ މުގާބިލުގައިކަމަށް ވެފައި އެކަން އެގޮތަށް ނުވުމުން ރައްޔިތުން ވަނީ ސަރުކާރާ މެދު ވަރަށް ބޮޑަށް ނުރުހިފައިކަން ފާހަގަކޮށްލެވެއެވެ.