ރައްޔިތުންގެ މަޖިލީހުގެ ހިންގާ ގަވާއިދަށް ގެނައި ބަދަލަކީ ގާނޫނު އަސާސީއާ ހިލާފު ބަދަލެއް ކަމަށް ކަނޑައަޅައިދިނުމަށް އެދި ބަންޑާރަނައިބުގެ އޮފީހުގެ ފަރާތުން ސުޕްރީމް ކޯޓަށް ހުށަހަޅާފައިވާ މައްސަލައިގެ އަޑުއެހުން މާދަމާ ހެނދުނަށް އަވަސްކޮށްފިއެވެ.

މަޖިލީހުގެ ހިންގާ ގަވާއިދުގެ 49 ވަނަ މާއްދާގެ ކ. އ. އަދި ވ. އަށް އެމްޑީޕީން އިސްވެ ވަނީ ބަދަލުތަކެއް ގެނެސްފައެވެ. އެ ބަދަލުތަކާ އެކު މަޖިލީހުގެ ޖުމުލަ މެންބަރުން ގުނާއިރު އިސްތިއުފާ ދެއްވި މެންބަރުން ނުގުނައެވެ.

ނަމަވެސް އެ މާއްދާތައް ބާތިލުކޮށްދޭން ސުޕްރީމް ކޯޓަށް ހުށެހެޅި ފަހުން އެމްޑީޕީން ވަނީ އަނެއްކާ ވެސް އެ މާއްދާތައް ބާތިލުކޮށް، އެހެން މާއްދާއަކަށް ހަމަ އެގޮތަށް އަކުރެއް އިތުރުކޮށްފައެވެ.

ބަންޑާރަނައިބުގެ އޮފީހުގެ މީޑިއާ އޮފިޝަލް މިއަދު ވިދާޅުވީ، އެ މައްސަލައިގެ އަޑުއެހުން މާދަމާ ހެނދުނު 9:45 އަށް އަވަސްކޮށްފައިވާ ކަމަށެވެ.

އެމައްސަލައިގެ ފުރަތަމަ އަޑުއެހުން ބާއްވަން ކުރިން ނިންމާފައި އޮތީ އަންނަ އާދިއްތަ ދުވަހުއެވެ.

ގަވާއިދަށް ގެނައި އިސްލާހާ އެކު މަޖިލީހުގެ ޖުމުލަ މެންބަރުން ގުނާއިރު މެންބަރުކަމުން އިސްތިއުފާ ދެއްވާފައިވާ މެންބަރުން ނުގުނާނެއެވެ. އެހެންވެ، މި މަޖިލީހުން ސަރުކާރާ ގުޅިވަޑައިގަންނަވަން އިސްތިއުފާ ދެއްވި ހަތް މެންބަރުން ނުލައި، މި މަޖިލީހުގައި މިހާރު ތިއްބަވަނީ 80 މެންބަރުންނެވެ. އެއީ، މުއްދަތު ކުޑަކަމުން ބައި-އިލެކްޝަނެއް ނުބާއްވަން އިލެކްޝަންސް ކޮމިޝަނުން ނިންމުމުންނެވެ.

ބަންޑާރަނައިބު އަހުމަދު އުޝާމް ވަނީ އެ މައްސަލައިގައި ހިމެނޭ މާއްދާތައް ބާތިލުކުރަން ސުޕްރީމް ކޯޓަށް ހުށަހަޅައިފައެވެ. އެ މައްސަލައިގައި ގޮތެއް ނުނިންމަނީސް އެ މާއްދާތަކަށް އަމަލުކުރުން މަޑުޖައްސައިލަން ވެސް ސުޕްރީމް ކޯޓުން ވަގުތީ އަމުރެއް ވެސް ނެރުނެވެ.

އެ މައްސަލަ ސުޕްރީމް ކޯޓުގައި ތާވަލުކުރި ފަހުން މަޖިލީހުގެ އާންމު ކޮމިޓީން ވަނީ އެ މާއްދާތައް ގަވާއިދުން އުނިކުރަން ފާސްކޮށްފައެވެ. އިއްޔެ ތަޅުމުން ވެސް ވަނީ ކޮމިޓީން ނިންމި ގޮތަށް ގަވާއިދަށް ބަދަލު ގެންނަން ފާސްކޮށްފައެވެ.