ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ގެ މެނޭޖިން ޑިރެކްޓަރުކަމުގެ މަގާމުގައި ހުންނެވި ބޭފުޅާ ބަދަލުކުރުމުން ހެޔޮ ނަތީޖާ ފެންނަ ކަމަށް ރައީސުލްޖުމްހޫރިއްޔާ ވިދާޅުވެފައިވާއިރު ރައީސުލްޖުމްހުރިއްޔާގެ މަގާމުގައި ހުންެވި ބޭފުޅާ ބަދަލުވެއްޖެ ނަމަ ގައުމުން ވެސް ހެޔޮ ބަދަލުފެނުން އެކަށީގެންވާ ކަމަށް ވައިކަރަދޫ ދާއިރާގެ މަޖިލިސް މެމްބަރު އަހުމަދު ޒިޔާދު (ފިއްޓޭ) ވިދާޅުވެއްޖެއެވެ.

ޒިޔާދު މި ފަދައިން ވިދާޅުވީ، މަޖިލިސް ޗުއްޓީގައި އޮތުމަށް ފަހު މިއަހަރު މަޖިލިސް ދެވަނަ ދައުރަށް ހުޅުވާ ބޭއްވި ޖަލްސާގައެވެ.

ހޯމަ ދުވަހު ކުރިއަށް ގެންދިޔަ ރައްޔިތުން މަޖިލީހުގެ ޖަލްސާގައި މޯލްޑިވްސް ސިވިލް އޭވިއޭޝަން އޮތޯރިޓީގެ ގާނޫނަށް އިސްލާހު ގެނައުމުގެ ބިލުގެ އިބްތިދާއީ ބަހުސްގައި މެމްބަރު ޒިޔާދު ވިދާޅުވީ ގައުމުގެ ގިނަ ކަންކަމުގައި ރައްޔިތުންގެ އިތުބާރު ގެއްލިފައިވާ ކަމަށެވެ.

އެގޮތުން ޝަރުއީ ނިޒާމަށް އިތުބާރު ނެތް ތަނެއްގައި ރައްޔިތުންނަށް އިތުބާރެއް ނޯންނާނެ ކަމަށާއި، މިއަދު މިގައުމުގެ ފެނާއި ކަރަންޓަށް ވެސް މިހާރު އިތުބާރެއް ނެތް ކަމަށް ޒިޔާދު ވިދާޅުވެފައިވެއެވެ. އަދި ސަރުކާރުން ފެށި ތަހުގީގެއް ސަބަބުން ބީއެމްއެލްއަށް ވެސް ރައްޔިތުންގެއިތުބާރެއް ނެތް ކަމަށް އޭނާ ވިދާޅުވިއެވެ.

ހަމައެހެންމެ ބޮޑެތި ތުހުމަތުތައް އަމާޒުވާ ކުންފުނިތަކުގެ ވެރިން ދުރުކުރާކަން ފާހަގަކުރައްވައި މެންބަރު ޒިޔާދު ވިދާޅުވީ އެފަދަ ބޭފުޅަކާ މެދު ފިޔަވަޅު އެޅިފައިނުވާ ކަމަށާއި، ކުރިއަށް ގެންދާ ތަހުގީގަށް ވާނުވާ ނޭނގޭ ކަމަށެވެ. އަދި އާއްމު ރައްޔިތުންގެ ފާޑުކިޔުންތައް އަމާޒުވުމުން ކުންފުނިތަކުން އެފަދަ ބޭފުޅުން ދުރުކުރި ނަމަވެސް އެކަން ރައްޔިތުން ބަލައި ނުގަންނާނެ ކަމަށާއި، އެވަރުން ނުފުދޭ ކަމަށް މެންބަރު ޒިޔާދު ވިދާޅުވިއެވެ.

ޒިޔާދު އިތުރަށް ވިދާޅުވީ މަޖިލީހަކީ ރައްޔިތުންގެ ހައްގުގައި ބަސް ބުނުމަށް ރައްޔިތުން އިންތިޚާބު ކުރި މެންބަރުންތަކެއް ކަމަށެވެ. ނަމަވެސް ރައްޔިތުން މަޖިލީހުގެ ގާނޫނު އަސާސީއަށް އެގެނައި އިސްލާހުގެ ސަބަބުން މިއަދު ރައްޔިތުން މަޖިލީހުގައި ރައްޔިތުންގެ މެންބަރުން ވެސް ނެތް ކަމަށް މެންބަރު ޒިޔާދު ވިދާޅުވިއެވެ.