މާފުށީ ޖަލުގައި ގައިދީއަކު ނިޔާވި ގޮތް ބެލުމުގެ މަސައްކަތް ނޭޝަނަލް އިންޓެގްރީޓީ ކޮމިޝަނުން ބަލަން ފަށައިފިއެވެ.

މަސްތުވާތަކެތީ މައްސަލައެއްގައި 25 އަހަރު ދުވަހުގެ ޖަލު ހުކުމް ތަންފީޒުކުރަމުން ދިޔަ މޫސާ ހަސަން (45އ), ނ. މާފަރު / ހިތްފަސޭހަގެ މަރުވެފައިވަނީ، މިދިޔަ އޭޕްރިލް މަހު އެމަޖަންސީ ހާލަތުގައި މާލޭ ގެނެސް އައިޖީއެމްއެޗްގައި އެޑްމިޓްކޮށް، ފަރުވާ ދެމުން ދަނިކޮށް ކަމަށް މައުލޫމާތު ލިބިފައިވެއެވެ.

އޭނާ މަރުވީ ހިތް ހުއްޓިގެން ކަމަށްވެއެވެ.

މިކަމާ ގުޅިގެން އިންކުއަރީއެއް ހަދަން ނިންމާ އިންޓަގްރިޓީ ކޮމިޝަނުން ބުނެފައި ވަނީ މޯލްޑިވްސް ކަރެކްޝަނަލް ސާވިސްގެ ބެލުމުގެ ދަށުގައި ހުރި ގައިދީއަކަށް 28 އޭޕްރީލް ވަނަ ދުވަހު އެމަޖެންސީ ހާލަތެއް މެދުވެރިވުމުގެ ސަބަބުން އައިޖީއެމްއެޗް ހޮސްޕިޓަލަށް ގެންގޮސް ފަރުވާދެނިކޮށް ޖޫން 4 ވަނަ ދުވަހުގެ ރޭ 23:45 ހާއިރު ނިޔާވެފައި ވާ ކަމުގެ މައުލޫމާތު ލިބުމާއި ގުޅިގެން އެކަން ހިނގާދިޔަ ގޮތް ދެނެގަތުމަށް ކޮމިޝަނުގެ ކުއްލި ހާލަތުގައި އިޖާބަދޭ ޓީމުން ހަރާކާތްތެރި ވަމުން ދާ ކަމަށެވެ.

މިގޮތަށް މި ކޮމިޝަނުން ނިންމާފައިވާއިރު، ކަރެކްޝަންސް އިން ބުނީ އޭނާ މަރުވި މައްސަލަ ފުލުހުންނާއި އާއިލާ އާއި އިންސްޕެކްޓާ އޮފް ކަރެކްޝަނަލް ސާވިސް އާއި ހިއުމަން ރައިޓްސް ކޮމިޝަނާއި ނޭޝަނަލް އިންޓެގްރިޓީ ކޮމިޝަނަށް ވެސް އަންގާފައިވާނެ ކަމަށެވެ.