ބިޒްނަސް ސެންޓަރ ކޯޕަރޭޝަން (ބީސީސީ) އާއި އިގްތިސާދީ ތަރައްގީ އާއި ވިޔަފާރިއާ ބެހޭ ވުޒާރާއާ ގުޅިގެން ކުރިއަށްގެންދާ "ހިޔަލަ ވީކެންޑް މާކެޓް'ގެ ޑިޖިޓަލް ޕާޓްނަރުގެ ގޮތުގައި ދިރާގުން ސޮއިކޮށްފިއެވެ.

ކޮންމެ ހަފްތާއެއްގެވެސް ބުރާސްފަތި ދުވަހުން ފެށިގެން ހުކުރު ދުވަހުގެ ނިޔަލަށް ހަވީރު 4:00 އިން 11:00 އަށް ހުޅުމާލެ ފޭސް އެކެއްގެ ކޮންޓެއިނާ މި މާކެޓް ކުރިއަށްގެންދެއެވެ. "ޕަވަޑް ބައި ދިރާގު"ގެ ގޮތުގައި ކުރިއަށްގެންދާ މި މާކެޓުގެ އަމާޒަކީ އަންހެން ވިޔަފާރިވެރިން ބާރުވެރިކުރުވައި އެފަރާތްތަކުގެ އުފެއްދުންތައް ދައްކާލައި ވިއްކުމަށް ޚާއްސަ ޕްލެޓްފޯމެއް ފޯރުކޮށްދިނުމެވެ.

އެގޮތުން ކޮންމެ ހަފުތާއަކުވެސް 18 އަންހެން ވިޔަފާރިވެރިންނަށް އެ ފަރާތްތަކުގެ އުފެއްދުންތައް ވިއްކުމުގެ ފުރުސަތު ބީސީސީން ދެއެވެ. އެގޮތުން އެ މުއައްސަސާއިން ވަނީ މިކަމަށް ޝައުގުވެރިވާ ފަރާތްތަކަށް ނަން ހުށަހަޅާ ވެއިޓްލިސްޓް ކުރުމުގެ އިންތިޒާމު ހަމަޖައްސައިފައެވެ.

ދިރާގުގެ މެނޭޖަރު ބްރޭންޑް އެންޑް އިވެންޓްސް، ނާޔާ ޝަރީފް ވިދާޅުވީ އަންހެނުން ބާރުވެރިކުރުމަކީ މި ޕްރޮގްރާމްގެ މައިގަނޑު އެއް މަގްސަދު ކަމަށާއި އަންހެން ވިޔަފާރިވެރިންނަށް މިހާރަށްވުރެ ފުޅާ ދާއިރާއެއްގައި އެމަސައްކަތް ކުރެވޭނެ ޕްލެޓް ފޯމެއް ދިނުމަށް މަސައްކަތް ކުރާނެ ކަމަށެވެ.

ބީސީސީގެ ޑިރެކްޓަރު ކޮމާޝަލް، މުހައްމަދު ޖައުޝަން ވިދާޅުވީ މި ޕްލެޓްފޯމް މެދުވެރިކޮށް ވީހާވެސް ގިނަ އަންހެން ވިޔަފާރިވެރިންނަށް ފުރުސަތު ހޯދައިދޭނެ ކަމަށެވެ.