ރާއްޖޭގެ އިގްތިސާދީ ސަރަހައްދުގައި ހަރަކާތްތެރިވަމުން ދަނިކޮށް، ދިވެހި ހަޔަތު މަސް ދޯންޏަކަށް އިންޑިއާގެ އަސްކަރިއްޔާގެ ސިފައިންތަކެއް ހަތިޔާރާއި އެކު އަރަން ޖެހުނު ސަބަބު އަދިވެސް ސާފުނުވާކަމަށް ފިޝަރީޒް މިނިސްޓަރު އަހުމަދު ޝިޔާމް ވިދާޅުވެއްޖެއެވެ.
ރައްޔިތުންގެ މަޖިލިހުގެ މިއަދުގެ ޖަލްސާއަށް ވަޒީރު ހާޒިރުކުރިއިރު, އިތުރު ސުވާލުކުރުމުގެ ފުރުސަތުގައި މާފަންނު އުތުރު ދާއިރާ ތަމްސީލު ކުރައްވާ، ދަ ޑިމޮކްރެޓްސް މެމްބަރު އިމްތިޔާޒް ފަހުމީ ކުރެއްވި ސުވާލަކަށް ޖަވާބު ދެއްވަމުން ޝިޔާމް ވިދާޅުވީ މަސްދޯނި ފަހަރަށް އިންޑިއާ ސިފައިން އެރި ސަބަބު ކަމާ ގުޅޭ ވުޒާރާތަކުން ސާފުކުރެއްވުމަށް ފަހު އެ މައުލޫމާތު މެމްބަރަށް ދެއްވާނެ ކަމަށެވެ.
ސީދާ އަޅުގަނޑުގެ ހިސާބުގައި ތި ސުވާލުގެ ޖަވާބެއް ނެތް.. ކީއްވެ ހިނގައިދިޔަ ކަމެއްތޯ.. އެ ސުވާލުގެ ޖަވާބު ގުޅުން ހުރި އިދާރާތަކުން ހޯދައި މެމްބަރާ ހިއްސާ ކުރާނެ ވާހަކަ ދަންނަވަން.
ޝިޔާމް
31 ޖެނުއަރީ އަދި 1 ފެބްރުއަރީގައި އިންޑިއާ ސިފައިން ވަނީ ހަތިޔާރާއެކީ ރާއްޖޭގެ މަސްދޯނިތަކަށް އަރާ ހަރަކާތްތެރިވެފައެވެ. އެވަގުތު އެދޯނިތައް ތިބީ ރާއްޖޭގެ ހާއްސަ އިޤްތިސާދީ ސަރަހައްދުގައި މަސްވެރިކަމުގައެވެ. އިންޑިއާ ސިފައިން ރާއްޖޭގެ ބޯޑަރަށް ވަނީ ހުއްދަ ހޯދުމަކާއި ނުލައެވެ. އެހެންކަމުން މިއީ ރާއްޖޭގެ ސަލާމަތީ ކަންތައްތަކަށް ހުރި ނުރައްކަލެއް ކަަމަށް ބުނެ ދިވެހި މަސްވެރިންވެސް ވަނީ ކަންބޮޑުވުން ފާޅުކޮށްފައެވެ.
މިކަމާ ގުޅިގެން ޖަްވާބުދާރީވުމަސް ރާއްޖޭގެ ފޮރިން މިނިސްޓްރީ މެދުވެރިކޮށް ޑިފެންސުން އެދިފައިވީ ނަމަވެސް އިންޑިއާއިން އަދިވެސް އެކަމުގައި ޖަވާބުދީފައި ނުވާކަން ވަނީ ހާމަވެފައެވެ.
