އުއްތަމަ ފަނޑިޔާރު ރިޓަޔަރ ކުރެއްވުމުން ދޭން ޖެހޭ އިނާޔަތް ބޮޑުކުރަން ލަފާދިން ދިނުމުން ހާމަވެގެން ދަނީ، ރައީސް ޑރ މުހައްމަދު މުއިއްޒުގެ ސަރުކާރުން ރާއްޖޭގެ ޖުޑީޝިއަރީގެ އެންމެ މަތީ ކޯޓު، ސުޕްރީމު ކޯޓަށް ފޮނުވި ހަމަލާއަކީ މުއުތަސިމްގެ ބައިވެރިވުމާ އެކު ދިން ހަމަލާއެއް ކަމަށް ކުރީގެ ނައިބު ރައީސް، ޑރ މުހައްމަދު ޖަމީލު އަހުމަދު ވިދާޅުވެއްޖެއެވެ.

ޝަރަފުވެރިކަމާއެކު ރިޓަޔާކުރައްވާ އުއްތަމަ ފަނޑިޔާރަކަށް ގަނޑުކޮށް ބައި މިލިއަން ރުފިޔާ އަދި މަހަކު އެލަވަންސްގެ ގޮތުގައި 70،000 ރުފިޔާ ލިބޭނެހެން ފަނޑިޔާރުންގެ ރިޓަޔާމަންޓް ގަވާއިދު ބަދަލުކުރަން ޖުޑީޝަލް ސާވިސް ކޮމިޝަން (ޖޭއެސްސީ) އިން ރައްޔިތުންގެ މަޖިލީހުގެ މާލިއްޔަތު ކޮމިޓީއަށް ހުށަހެޅުމަށް އިޝާރާތްކުރައްވާ ޑރ ޖަމީލު ވަނި އެކްސްގައި ޕޯސްޓެއް ކުރައްވާފައެވެ.

އެ ޕޯސްޓުގައި ޑރ ޖަމީލު ވިދާޅުވީ، މިއަދު ޙަގީގަތް ހާމަވެގެން ހިނގައްޖެ ކަމަށެވެ. އެގޮތުން މިދަނީ ސުޕްރީމް ކޯޓަށް ރައީސް މުއިއްޒު، ޙަމަލާ ދިނީ އުއްތަމަ ފަނޑިޔާރުގެ މަގާމުގައި ހުންނެވި މުޢްތަސިމުގެ ފުރިހަމަ އެއްބާރުލުމާ އެކީގައިކަން ހާމަވެއްޖެ ކަމަށް ވިދާޅުވެ ޑރ ޖަމީލު އިތުރަށް ވިދާޅުވީ، އުއްތަމަ ފަނޑިޔާރު މިކަމުގައި އެ ދައުރު އަދާކުރީ ކީއްވެކަން މިޕެކޭޖުން އޮތީ ފެންނަން ކަމަށެވެ.

އިންސާފުގެ ގޮނޑީގައި އިށީދެ ތިބެވެސް އަމިއްލަ މަންފައަށް ނޫން ކަމެއް ނުވިސްނޭ ބޭފުޅުންނަށް ރައްޔިތުންނަށް ހޯދައި ދެވޭނެ އަދުލުވެރިކަމެއް ނޯންނާނެ ކަމަށް ވެސް ޑރ ޖަމީލު ވިދާޅުވެފައިވެއެވެ. އަދި މިއީ މިހާތަނަށް ފެނުނު އެންމެ ވިޔާނުދާ އެއް ޢަމަލު ކަމަށާ ރައްޔިތުން ނިކަމެތި ޙާލުގައި އުޅެނިކޮށް، މިފަދަ ޕެކޭޖެއްގެ ދަހިވެތި ކަމުގައި ސަރުކާރާއިއެކު ޑީލް ހަދައި ޖުޑިޝަރީގެ މިނިވަންކަން ‘ވިއްކާލި’ މީހެއްގެ ގޮތުގައި މުޢުތަސިމްގެ ނަން ތާރީޚުގައި ލިޔެވޭނެ ކަމަށް ވެސް ޑރ ޖަމީލު ވަނީ ވިދާޅުވެފައެވެ.

ޑރ ޖަމީލުގެ ޕޯސްޓު ނިންމަވާ ލައްވަމުްނ ވިދާޅުވެފައިވަނީ ދެން އަންނަ ދިވެހިންގެ ރާއްޖޭގެ ވެރިކަމެއްގައި މިފަދަ ޕެކޭޖްތައް މުރާޖަޢާކޮށް ކޮރަޕްޓް ޑީލްތައް ބާތިލް ކުރެވޭނެ ކަމަށެވެ. ބެލެވޭ ގޮތުގައި އެ ވިދާޅުވީ އެފަދަ ގަވާއިދާ ޚިލާފުކަންކަން ކޮށްފައި ތިބި ބަޔަކަށް ގާނޫނު އަރާ ހަމަކުރުވާނެ ވާހަކައެވެ.