އުސޫލަކަށް ބަލާނަމަ ތިންބާރު ވަކިވެފައި އޮތުން އެއީ އައިޑިޔަލިޒަމް އެއް ކަމުގައި ރައީސް އަބްދުﷲ ޔާމީން އަބްދުލް ޤައްޔޫމް ވިދާޅުވެއްޖެ އެވެ.

އެމަނިކުފާނު މިހެން ވިދާޅުވެފައި ވަނީ ޕީއެންއެފްގެ ފްރޮންޓް އޮފީހުގައި ބުރާސްފަތި ދުވަހުގެ ރޭ ބޭއްވި ޖަލްސާގައި ވާހަކަފުޅު ދައްކަވަމުންނެވެ.

ވެރިކަން ކުރުމުގެ ބާރާއި، ޤާނޫނު ހެދުމުގެ ބާރާއި، އަދުލު އިންސާފު ޤާއިމް ކުރުމުގެ ބާރަކީ ޑިމޮކްރަޓިކް ކޮމްނެ ޤައުމެއްގައިވެސް ވަކި ކޮށްފައި ވާ 3 ބާރެވެ. ވީއިރު އެމްޑީޕީގެ ނިމިދިޔަ 2 ވެރިކަމުގައިވެސް ޤާނޫނު އަސާސީގައި ކަނޑައަޅާފައި އެވާ ތިންބާރު އޮތީ މަސްހުނި ވެފައި ކަމަށް އެމަނިކުފާނު ވިދާޅުވި އެވެ.

ތިންބާރު ވަކި ކުރުމުގެ ސިޔާސަތުގައި އަޅުގަނަޑުމެންގެ ހިސްޓްރީ އޮތީ މާތާހިރު ކޮށް ނޫން ކަމަށާއި، އެއިރެއްގައި ވެރިކަން ހިންގަން ހުންނަ ފަރާތުން ބާރުތައް ވަކިކޮށް، ތިން ދާއިރާގައިވެސް ހުންނަވާ ފަރާތުން އެބައެއްގެ ގޮތްނިންމުމުގެ މިނިވަންކަން ދޭން ބޭނުން ނުވަނީ ކަމުގައި އެމަނިކުފާނު ވިދާޅުވި އެވެ.

އޭގެ ބަދަލުގައި އެއިރެއްގެ ވެރިއަކަށް ހުންނަ ފަރާތަކުން ބޭނުން ވަނީ ޝެހެންޝާ ވެފަ ހުރިހާ ބާރެއް އަމިއްލަ މުށު ތެރޭގައި ބާއްވަން ކަމަުގައި ކަމަށް އެމަނިކުފާނު ވިދާޅުވި އެވެ.