ފުލުހުންގެ މުވައްސަސާއަށް ސިޔާސީމީހުން ފާޑުކިޔަން ޖެހެނީ މުއައްސަސާގައިވެސް ގޯސްތަކެއް ހުރުމުން ކަމުގައި ރައީސް އަބްދުﷲ ޔާމީން އަބްދުލް ޤައްޔޫމް ވިދާޅުވެއްޖެއެވެ.

ރައީސް ޔާމީން މިހެން ވިދާޅުވީ ޕީއެންއެފްގެ ފްރޮންޓް އޮފީހުގައި ބުރާސްފަތި ދުވަހުގެ ރޭ ކުރިއަށް ގެންދިޔަ ޖަލްސާގައި ވާހަކަފުޅު ދައްކަވަމުންނެވެ.

އެމަނިކުފާނު ވިދާޅުވީ އެތަނެއްގެ އަގު ދަމަހައްޓާނީ އެތަނެއްގެ އިސްވެރިން ކަމުގައެވެ. ރައްޔިތުން ގަބޫލު ނުކުރާނޭ ފެންވަރަކަށް އެ މުއައްސަސާގެ އަގު މިއަދު ވަނީ ވެއްޓިފައި ކަމަށްވެސް ރައީސް ޔާމީން ވިދާޅުވިއެވެ.

އެމަނިކުފާނު ވިދާޅުވީ އެތަނެއްގެ ކަރާމާތާއި އެތަނެއްގެ އަގު ދަމަހައްޓާނީ އެތަނެއްގައި އުޅޭ ބަޔަކު ކަމަށެވެ.

ސިޔާސީ މިހުން ފާޑު ކިޔަން ޖެހެނީ ރާއްޖޭގެ ހުރިހާ ކަމެއްހެން ގޯސްވެގެން ދާއިރު އެކަމުގައި ފުލުހުންގެ މުވައްސަސާވެސް އިސްތިސްނާ ނުވާތީ ކަމަށާއި ފާޑު ކިޔުއްވާއިރު އެންޓިކޮރޮޕްޝަނާއި އަދި ރައީސުލްޖުމްހޫރިއްޔާވެސް އިސްތިސްނާ ނުވާނެ ކަމުގައި އެމަނިކުފާނު ވިދާޅުވިއެވެ.

ފުލުހުންނަކީ ރައްޔިތުންގެ އާންމު ދިރިއުޅުމުގައިވެސް ބޭނުން ޖެހޭ ބަޔަކަށް ވީއިރު އެ މުއައްސަސާގެ ކަންތައްތަކާމެދު ހިންހަމަޖެހިވަޑައި ނުގަންނަވާ ކަމަށްވެސް އެމަނިކުފާނު ވިދާޅުވިއެވެ.

މިއަދާހަމައަށް އެމުއައްސަސާގައި އެތައް މައްސަަލައެއް އެންމެކުޑަމިނުން ފައިލްވެސް ހުޅުވާނުލައި ހުރި އިރު ރައްޔިތުން އިންސާފާއި އެހީތެރިކަމަށް އެންްމެ އުންމީދުކުރާ އެއް ބަޔަކީ އެމީހުންނެވެ.