ފަލަސްތީނުގެ ސަރުކާރުގެ އެދުމުގެ މަތިން އެ ގައުމުގެ ހައްގުގައި، އިންޓަނޭޝަނަލް ކޯޓު އޮފް ޖަސްޓިސް (އައިސީޖޭ) އަށް ރާއްޖޭން ބަޔާނެއް ދޭން ނިންމާފައިވާ ކަމަށް ފޮރިން މިނިސްޓަރު މޫސާ ޒަމީރު ވިދާޅުވެއްޖެއެވެ.
މިނިސްޓަރު މިހެން ވިދާޅުވީ ފަލަސްތީނުގެ ރައްޔިތުންނާ ދެކޮޅަށް އިޒްރޭލުން ހިނގަމުންދާ ލާއިންސާނީ އަމަލުތައް ހުއްޓާލުމަށާއި މިނިވަން ދައުލަތަކަށް ގޮވާލައި ވިލިނގިލީ ދާއިރާގެ މެންބަރު ސައުދު ހުސައިން މަޖިލީހަށް ހުށަހެޅުއްވި ގަރާރާ ގުޅޭ ގޮތުން މަޖިލީހުގެ ހާރިޖީ ގުޅުންތަކާ ބެހޭ ކޮމިޓީގައި ވާހަކަ ދައްކަވަމުންނެވެ.
މި ބަޔާންދޭން ނިންމާފައިވަނީ އަންނަ ހޯމަ ދުވަހުއެވެ.
ޒަމީރު އިތުރަށް ވިދާޅުވީ، އދ. ގެ އާންމު މަޖިލީހުން އައިސީޖޭގެ ލަފައަކަށް އެދިފައިވާ މައްސަލާގައި ރާއްޖެ އިން ހަރަކާތްތެރިވަމުން އަންނަ ކަމަށާއި، ފަލަސްތީނުގެ ސަރުކާރުގެ އެދުމުގެ މަތިން އައިސީޖޭއަށް ލިޔުމުން ބަޔާނެއް ހުށަހަޅާފައިވާ ކަމަށެވެ.
ޒަމީރު ވިދާޅުވީ އަދި އެމައްސަލަ އާ ގުޅޭގޮތުން މިމަހުގެ 26 ވަނަ ދުވަހު ރާއްޖޭން ބަޔާނެއް ދިނުމަށް ނިންމާފައިވާ ކަމަށާއި، އެކަމަށް ސަރުކާރުން ވާންޖެހޭ ތައްޔާރީތައް ވަމުންދާ ކަމަށެވެ.
