މާލޭގެ މަގުމަތީގައި މަޑުކޮށްގެން އޮތް އެމްޓީސީސީ ބަހެއްގައި ސައިކަލެއް ޖެހި ނުރައްކާތެރި އެކްސިޑެންޓެއް ހިނގައިފިއެވެ.

ފުލުހުން ބުނީ ބޮޑުތަކުރުފާނު މަގު ހުޅަނގުން އިރަށް ދުއްވަމުން އައި ސައިކަލެއް ސްޓެލްކޯ ކައިރީ ބަސް ސްޓޮޕްގައި މަޑުކޮށްގެން އޮތް އެމްޓީސީސީ ބަހެއްގެ ފަހަތުގައި ޖެހި، ނުރައްކާތެރި އެކްސިޑެންޓެއް ހިނގާފައިވާ ކަމަށެވެ.

ސައިކަލު ބަހުގައި ޖެހުމަށްފަހު، މަގުގެ އަނެއް ފަރާތުގައި އޮތް ކާރެއްގައި ވެސް ޖެހިފައިވާ ކަމަށް ފުލުހުން ވަނީ ބުނެފައެވެ.

ފުލުހުން އިތުރަށް ބުނީ އެކްސިޑެންޓް ހިނގާފައިވާ ކަމަށް ރިޕޯޓް ކޮށްފައިވަނީ މިރޭ 20:00 އެހާކަންއިރު ކަމަށެވެ.

މި އެކްސިޑެންޓުގައި އަނިޔާ ލިބިފައިވަނީ ސައިކަލް ދުއްވަން އިން 18 އަހަރުގެ ޒުވާން ފިރިހެން ކުއްޖަކަށެވެ.

އެ ކުއްޖާއަށް މިހާރު ދަނީ އައިޖީއެމްއެޗްގެ އެމަޖެންސީގައި ފަރުވާ ދެމުންނެވެ.

ފުލުހުން ބުނީ އެކްސިޑެންޓާއި ގުޅިގެން މިހާތަނަށް ބެލި ބެލުމުން ސައިކަލް ދުއްވަން އިން ޒުވާނާގެ އަތުގައި ލައިސަންސްވެސް ނެތް ކަން އެނގިފައިވާ ކަމަށާއި މި މައްސަލަ އިތުރަށް ތަހުޤީގު ކުރަމުން އަންނަ ކަމަށެވެ.