ޕީއެންސީއިން ގައުމަށްވީ އެންމެ ބޮޑު ޚިޔާނާތަކީ، "އިންޑިއާ މިލިޓަރީ އައުޓު"އަށް ޚިޔާނާތްތެރިވުން ކަމަށް ކުރީގެ ހޯމް މިނިސްޓަރު އުމަރު ނަސީރު ވިދާޅުވެއްޖެއެވެ.

ޗެނަލް13 ނިއުސް ޓޯކު ޕްރޮގްރާމުގައި ވާހަކަ ދައްކަވަމުން އުމަރު ވިދާޅުވީ، ރައީސް މުއިއްޒުގެ ސަރުކާރަށް ވެރިކަމުގެ މިވީ ދުވަސްތަކުގައި ކުރެވުނުހާ ވެސް ކަމަކީ ކަންކަމުގައި ރައްޔިތުންނަށް ހަގީގަތް އޮޅުވާލާ ދޮގުތަކެއް ހެދުން ކަމަށެވެ.

އެގޮތުން ރައްޔިތުންނަށް އެންމެ ބޮޑަށް މި ސަރުކާރުން ހެދި ދޮގުތަކުގެ ތެރޭގައި އިންޑިއާ ސިފައިން މި ގައުމުން ބޭލުމާ ރައީސް އަބްދުﷲ ޔާމީން މިނިވަން ކުރުން ހިމެނޭއިރު އެ ދެ ކަމުންވެސް ސަރުކާރުން ބޭނުންވާ ނާޖާއިޒު ފައިދާ ނަގާ ފަހުން އެކަން ވެސް އޮޅުވާލީ ކަމަށް އުމަރު ވިދާޅުވިއެވެ.

އުމަރު ވިދާޅުވީ އިންޑިއާ ސިފައިން ބޭރުކުރަން އައިސް މި ސަރުކާރުން މިހާރު ތިބީ އިންޑިއާގެ އުނގަށް ދުވަހަކުވެސް ދިވެހި ސަރުކާރަކުން ނުވެއްޓޭ މިންވަރަށް ވެއްޓިފައި ކަމަށެވެ.

އުމަރު އިތުރަށް ވިދާޅުވީ، މި ސަރުކާރުން ވެސް ވެރިކަމަށް އަރާ ކިޔަނީ އެމްޑީޕީ އެކޭ އެއް ލަވައެއް ކަމަށާ ނަމަވެސް ތަފާތީ ރާގު ކަމަށެވެ.

އެގޮތުން ބޮޑު ދަރަންޏެއް ބޮލުގައި އަޅައިގެން ވެރިކަން ކުރަން އުނދަގޫ ކަމަށް ސަރުކާރުގެ ވެރިން ދައްކަމުންދާ ބަހަނާ ފާހަގަކޮށް އުމަރު ވިދާޅުވި ވެރިކަމަށް އައީ ވެސް އެ ދަރަނި އޮތްކަން އެނގި ތިބެ ކަމަށާ އެހެންކަމުން ދަރަނީގެ ބަހަނާ ނުދެއްކޭނެ ކަމަށެވެ.