ޑެބިޓު ކާޑުތައް ބޭނުންކޮށްގެން އާންމުކޮށް ދިވެހީން ކުރާ ވިޔަފާރިތަކުން 30 ޕަސެންޓްގެ ފީއެއް ނަގަން ނިންމުމާއެކު ކާޑުތަކުގެ ޑޮލަރު ލިމިޓު 500 އަށް ބޮޑުކުރުމަކީ ބޮޑު ސްކޭމެއް ކަމަށް ހިތަދޫ ދެކުނު ދާއިރާގެ މަޖިލިސް މެންބަރު، އިބްރާހިމް ނާޒިލް ވިދާޅުވެއްޖެ އެވެ.

ބޭންކުން ބުނީ ރާއްޖޭން ބޭރަށް ދަތުރުނުކުރާ މީހުންގެ ކާޑުތައް ވެސް ރާއްޖޭން ބޭރަށް ގެންގޮސްގެން އޭޓީއެމްތަކުން ފައިސާ ނަގަމުންދާކަން ވަނީ ފާހަގަކުރެވިފައި ކަމަށެވެ. މުދަލާއި ޚިދުމަތުން ފައިސާ ދެއްކޭ އަދަދު އިތުރުކޮށްދިނުމާއެކު އޭޓީއެމްއިން ރާއްޖޭން ބޭރުގައި ނަގުދު ފައިސާ ނެގޭނެ އަދަދަކީ މަހަކު 125 ޔޫއެސް ޑޮލަރު ކަމަށް ބޭންކުން ބުނެއެވެ. އަދި އޭޓީއެމްއިން ފައިސާ ނެގުމުން ޗާޖްކުރެވޭ އަދަދަކީ 10 ޔޫއެސްޑޮލަރު ކަމަށް ވެސް ބޭންކުން ބުނެއެވެ.

މި ބަދަލާއި ގުޅިގެން މަޖިލީހުގެ މިއަދުގެ ޖަލްސާގައި ހިތަދޫ ދެކުނު ދާއިރާގެ މެންބަރު ވިދާޅުވީ ޑެބިޓް ކާޑު ބޭނުންކޮށްގެން އާންމުކޮށް ދިވެހީން ކުރާ ވިޔަފާރިތަކުން 30 ޕަސެންޓުގެ ފީއެއް ނަގަން ނިންމުމުން ހަގީގަތުގައި ޑެބިޓު ކާޑުތައް ބޭނުންކޮށްގެން 500 ޑޮލަރުގެ ވިޔަފާރި ނުކުރެވޭނެ ކަމަށެވެ.

އޮންލައިންކޮށް ކުރާ ވިޔަފާރިތައް ވަރަށް ބޮޑަށް އިތުރުވެފައިވާތީ އެފަދަ ދިވެހިން ވިޔަފާރިކުރާ އެފަދަ އާންމު ޕްލެޓްފޯމްތަކުން ވިޔަފާރިކުރާ އިރު، 30 ޕަސެންޓާއާ ހަމައަށް ފީއެއް ނެގޭނެ ކަމަށް ބީއެމްއެލް އިން ބުންޏެވެ. ޑެބިޓް ކާޑުތަކުގެ ޑޮލަރު ލިމިޓް ބޮޑުކުރިއިރު، އާންމު ކްރެޑިޓް ކާޑުތަކުން ބޭރުގެ މުއާމަލާތްތަކަށް ބޭނުންކުރެވޭނީ މަހަކު 750 ޑޮލަރެވެ.

ބޭންކުން ބުނީ، އިސްކަންދެނީ ރާއްޖޭން ބޭރުން ޑެބިޓް ކާޑުން ކުރެވޭ މުއާމަލާތްތަކުގައި އާންމު ފަރުދުންގެ ޒަރޫރީ ބޭނުންތަކަށް ރަނގަޅު ހައްލެއް ހޯދައި ދިނުމަށެވެ. ޑެބިޓް ކާޑުތަކާއި ކްރެޑިޓް ކާޑުތަކަށް މަހަކަށް ކަނޑައެޅޭ ލިމިޓް ބެލުމުގައި މީގެ ފަހުން ބަލާނީ މަހުގެ ފުރަތަމަ ދުވަހުން ފެށިގެން މަހުގެ ފަހު ދުވަހާއި ހަމައަށް ކަމަށް ވެސް ބީއެމްއެލް އިން ބުންޏެވެ.