ދިރާސާތަކަށް ބޭނުންކުރާ ކަމަށް ބުނާ ޗައިނާގެ އުޅަނދެއް ކަމަށްވާ 'ޝިއަންގް ޔަންގް ހޮންގް 3' ރާއްޖޭގައި ބަނދަރު ކޮށްފިއެވެ.

މިއަދު ހެނދުނު 9:42 ގައި ރާއްޖެ ސަރަހައްދުގައި ބަނދަރުކުރި ކަމަށް ދައްކާ "ޝިއަންގް ޔަންގް ހޮންގް 3" އަކީ ވެސް އިންޑިއާގެ ނުރުހުމާ ހެދި އަވައްޓެރި ސްރީލަންކާއަށް ވެސް ވަނުމުގެ ހުއްދަ ނުދިން އުޅަނދެކެވެ.

އެ އުޅަނދު ރާއްޖެއާ ދިމާލަށް މިސްރާބު ޖެހީ މި މަހު ކުރީކޮޅެވެ.

ރާއްޖޭގެ ފޮރިން މިނިސްޓްރީން ކުރިން ބުނެފައި ވަނީ އެ ބޯޓު ރާއްޖޭގައި މަޑުކުރަނީ ފަޅުވެރިން ބަދަލުކުރުމަށާއި ބޯޓަށް ބޭނުންވާ ކާނާ އެރުވުމަށް ކަަމަށެވެ. އަދި އެ ބޯޓް ރާއްޖެ އަންނަނީ ދިރާސާއެއް ހަދަން ކަމަށް ބުނެ އިންޑިއާއިން ކަންބޮޑުވުން ފާޅުކޮށްފައި ވިޔަސް، މިނިސްޓްރީން ވަނީ އެ ބޯޓު އަންނަނީ ދިރާސާ އަކަށް ނޫން ކަމަށާއި އެ ހުއްދަ ނުދޭ ކަމަށެވެ.

ޗައިނާގެ ރިސާޗް އުޅަނދުތައް އިންޑިއާ ކަނޑުގެ ސަރަހައްދަށް ވަނުމާ އެންމެ ދެކޮޅު، އެންމެ ކަންބޮޑުވާ އެއް ގައުމަކީ އިންޑިއާއެވެ. މިއީ އަސްކަރީ ނަމުގައި ބޭނުންކުރާ އުޅަނދުތަކެއް ނޫން ނަމަވެސް އެ ގައުމުން ތުހުމަތުކުރާ ގޮތުގައި މި ރިސާޗްތަކުގައި އެއްކުރާ މައުލޫމާތު ބޭނުންކުރަނީ އަސްކަރީ ބޭނުންތަކަށެވެ.

ޗައިނާގެ އަސްކަރީ ނުފޫޒު އިންޑިއާ ކަނޑަށް ފެތުރިދާނެ ކަމުގެ ބިރު އަބަދުވެސް އޮންނަ އިންޑިއާއިން ބުނާ ގޮތުގައި ޗައިނާގެ އުޅަނދުގެ މަގުސަދަކީ އިންޑިއާ ކަނޑުގައި ޗައިނާގެ ސަބްމެރިންތައް ބޭނުންކުރާނެ މައުލޫމާތު އެއްކޮށް، ޖާސޫސްކުރުން ކަމަށެވެ.

އިންޑިއާއިން އެދިގެން، އަވަށްޓެރި ސްރީލަންކާއިން ވެސް އެ ގައުމަށް އެތެރެވާން، ހުއްދަ ނުދީ ވަނިކޮށް މި ބޯޓު ރާއްޖެ އަންނަން ހުއްދަ ދިނުމާ އެކު، މިހާރު ވެސް ރާއްޖެއާ ގުޅުން ހީނަރުވެފައި އޮތް އިންޑިއާގެ ގުޅުން އިތުރަށް ވަނީ ގޯސްވެފައެވެ.