އިންތިހާބުތަކާ ދިމާކޮށް ރައީސް އަބްދުﷲ ޔާމީންގެ މައްސަލަތައް ލަސްކުރަނީ ނުފޫޒުން ކަމަށް ވިދާޅުވެ އެމަނިކުފާނުގެ އިސް ގާނޫނީ ވަކީލު ޑރ. މުހައްމަދު ޖަމީލު އަހުމަދު ކަންބޮޑުވުން ފާޅުކޮށްފިއެވެ.

ރައީސް ޔާމީންގެ އިސް ގާނޫނީ ވަކީލު ޑރ. މުހައްމަދު ޖަމީލު އަހުމަދު ނެރުއްވި ބަޔާނެއްގައި ވިދާޅުވީ ކޮންމެ އިންތިހާބަކާ ދިމާކޮށް ކުރީގެ ރައީސް އަބްދުﷲ ޔާމީންގެ އިސްތިއުނާފް މައްސަލަ ލަސްކުރަނީ ނުފޫޒު ފޯރުވައިގެން ކަމަށެވެ.

ރައީސް ޔާމީންގެ ފަރާތްޕުޅުން ދިވެހި ރާއްޖޭގެ ހައި ކޯޓަށް ހުށަހަޅާފައިވާ، ވ. އާރަށުގެ އިސްތިއުނާފީ މައްސަލައިގެ ހުކުމް ކުރުން ދިގުލައިގެން ގޮސްފައިވާ ދަނޑިވަޅުގައި، އެމަނިކުފާނުގެ ވަކީލުންގެ ޓީމުން ނެރުނު ބަޔާނުގައި ވިދާޅުވެފައި ވަނީ އެމަނިކުފާނުގެ މައްޗަށް ކުށް ސާބިތު ކުރަން ބޭނުން ވެގެން އަވަސް އަރުވާލައިގެން ޝަރީއަތްތައް ހިންގި މަންޒަރު ވެސް ފެނިގެން ދިޔަ ކަމަށެވެ.

"އިންތިހާބުތަކާ ދިމާކޮށް ރައީސް ޔާމީންގެ މައްސަލައިގެ އިސްތިއުނާފް ކޯޓުތަކުގައި ލަސްވާތަން ފެންނައިރު، ރައީސް ޔާމީންގެ މައްޗަށް ކުށެއް ސާބިތުކުރަން ބޭނުންވީމާ އަވަސް އަވަހަށް ޝަރީއަތްތައް ހިންގައި ހުކުމް ޖަހާތަން ވެސް ފެނިގެން ގޮސްފައިވާއިރު، މިދެންނެވުނު ކަންކަމަށް ބަލާއިރު، ރައީސް ޔާމީނަށް މިއަދު ގާނޫނުގެ ރައްކާތެރިކަމާއި ހަމަހަމަކަން ޖުޑިޝަރީން ކަޑަވަރުކޮށްދޭ ކަމަކަށް ގަބޫލެއް ނުކުރެވޭ،" އެ ބަޔާނުގައިވެ އެވެ.

ވަކީލުންގެ ބަޔާނުގައި ބުނެފައި ވަނީ، ފަނޑިޔާރުންނަކީ ދުސްތޫރުގެ ސުޕްރިމަސީ ނަގަހައްޓަން ހުވާކޮށްގެން ތިބި ބަޔަކަށްވާއިރު، ސިޔާސީ ނުވެ، ވަކި ފަރާތަކަށް ނުޖެހި ގާނޫނުގެ ވެރިކަން ދަމަހައްޓަން ތިބި ބައެއް ކަމަށެވެ. އެމީހުން މަސައްކަތް ކުރަން ޖެހޭނީ، ވަކި މީހަކަށްވީތީ ތަފާތުކުރުމެއް ނެތި، އެއްވެސް ދިމާލަކުން އަންނަ ނުފޫޒަކަށް ނުލެނބި ކަމަށެވެ.

ރައީސް އަބްދުﷲ ޔާމީންގެ މައްޗަށް ކުރިމިނަލް ކޯޓުން، ވ. އާރަށުގެ މައްސަލައިގައި ކުރި ހަރާން ހުކުމުގެ އިސްތިއުނާފު މަރުހަލާގެ އަޑު އެހުންތައް ހުކުމާ ހަމައަށް ވާސިލްވެ 3 މަސްވެފައިވާއިރު އަދިވެސް ހުކުމުގެ މަޖިލިސް ތާވަލްނުކޮށް ދަނީ ލަސްކޮށް ފަސްކުރަމުންނެވެ.

އިސްއިތުނާފުގެ މަރުހަލާއަކީ އަވަސްކޮށް ބަލާނިންމަން ޖެހޭ މަރުހަލާއެއް ނަމަވެސް ހައިކޯޓުގެ ފަނޑިޔާރުން ގެންދަވަނީ ތަފާތު އުޒުރުތައް ދައްކަވާ މައްސަލަ ނުނިންމާ ލަސްކޮށް ދިގު ދަންމަމުންނެވެ.

އެގޮތުން ނޮވެމްބަރު މަހުގެ 21 ވަނަ ދުވަހު ފަހު އަޑު އެހުން ބާއްވާ ދެ ފަރާތަށް ވެސް ފަހު ބަސްބުނުމުގެ ފުރުސަތު ދިނުމަށް ފަހު ރިޔާސަތުން ދެން ވިދާޅުވީ، އިތުރު ކަމެއް ސާފުކުރުމަށް ނެތްނަމަ ދެން އޮންނާނީ ހުކުމް ކުރުން ކަމަށެވެ.

އޭގެ ފަހުހް ތިން މަސް ފާއިތުވެގެން ދިޔައިރުވެސް އަދިވެސް މައްސަލައިގެ އިތުރު އަދާހަމައެއް ކޯޓުން ހާމަކޮށްފައިނުވެއެވެ. އެންމެ ފަހުން މައުލޫމާތު ލިބުނު ގޮތުގައި ލަސްވަނީ ލިޔެކިޔުންތައް ޓައިޕްކުރުމުގައި ގިނަ ވަގުތު ނަގާތީއެވެ. ނަމަވެސް ދެމަސް ތިން މަސް ފާއިތުވެގެން ދާއިރު މައްސަލައެއްގެ ލިޔެކިޔުންތައް ތައްޔާރުނުވުމަކީ ކޯޓުގެ މުވައްޒަފުންނާ ފަނޑިޔާރުންގެ ގާބިލުކަމާ މެދުވެސް ސުވާލު އުފައްދަން ޖާގަ ތަނަވަސް ވެގެން ދާ ކަމެކެވެ.