ދިވެހިން އިންޑިއާއަށް ދަތުރުކުރާއިރު އީ-ސިނގިރޭޓް އާއި ވޭޕް ފަދަ ތަކެތި ނުގެންދިއުމަށް މޯލްޑިވިއަނުން އިލްތިމާސް ކޮށްފިއެވެ.

މިކަން އިއުލާން ކޮށްފައިވަނީ ގައުމީ އެއާލައިން މޯލްޑިވިއަންއިން ބުރާސްފަތި ދުވަހު އެކްސްގައި ކުރި ޕޯސްޓެއްގައެވެ.

މޯލްޑިވިއަންއިން ބުނެފައިވާ ގޮތުގައި އިންޑިއާގެ ވައިގެ ދަތުރުފަތުރާ ބެހޭ އިދާރާއިން އާންމުކޮށްފައިވާ ގަވާއިދުގެ ދަށުން އީ-ސިނގެރޭޓް އަދި ވޭޕްކުރަން ބޭނުންކުރާ އެއްވެސް ބާވަތެއް އިންޑިއާއަށް އެތެރެކުރުމާއި ބޭރުކުރުމަކީ މަނާ ކަމެކެވެ.

މިގޮތަށް އަމަލުކުރީ އިންޑިއާ އަށް ދަތުރުކުރާ ބައެއް ފަސިންޖަރުން އީ-ސިނގެރޭޓް އަދި ވޭޕް ގެންދާ މައްސަލަ އާންމުވެފައި ވާތީ ފަސިންޖަރުންގެ ސަމާލުކަމާއި ރައްކާތެރިކަމަށްޓަކައި ކަމަށްވެސް އެ އިއުލާނުގައި ވެއެވެ.

ދިވެހިން އެންމެ ގިނައިން ދަތުރުކުރާ އެއް ގައުމު ކަމަށްވާ އިންޑިއާ އަށް ވައިގެމަގުން އީ-ސިނގެރޭޓާއި ވޭޕްކުރަން ބޭނުންކުރާ އެއްވެސް ބާވަތެއް އެތެރެކުރުމާއި ބޭރުކުރުން މަނާކުރީ 2020 ވަނަ އަހަރު އެވެ. އަދި އިންޑިއާ ސަރުކާރުން އެ ގައުމުގައި އީ-ސިނގެރޭޓް އަދި ވޭޕް ބޭނުންކުރުން މަނާކޮށްފައިވަނީ 2019 ވަނަ އަހަރު އެވެ.