ރައީސް އަބްދުﷲ ޔާމީންގެ ހުސްގޮނޑި އާއި ފޮޓޯ ބަހައްޓައިގެން ވެރިކަމަށް އައި ބަޔަކު މިއަދު އަނެެއްކާވެސް މި ފެށީ ހަމަ އެ ކުޅިވަރު ތަކުރާރު ކުރަންށެވެ. ހީވަނީ ޖެހިގެން ހުރިގޭ ޓީވީން ހިންދީ ޑްރާމާއެއް އަޅުވައިގެން އުޅޭހެނެއެވެ. ބަހެއް ބުނެލާއިރަށް ބެކްގްރައުންޑް މިޔުޒިކްގައި ދުމްތަނަނަ އެބައިވެއެވެ. ޖެހިގެން ހުރި ގޭގެ ޓީވީން އަޅުވާފައި ހުރީ ހިންދީ ޑްރާމާއެއް ނޫނެވެ. ނަމަވެސް އެހާމެ ބޮޑު ޑްރާމާ ކުޅޭ ވެރިއެއްގެ ޖަލްސާއެވެ.

އާދެ! އަޅުގަނޑު މިދައްކަނީ އަދުގެ ރައީސް ގެ ވާހަކައެވެ. ހޭބޯ ނާރައިގެން އަނެއްކާވެސް ރައްޔިތުން ގާތައް ގޮސް ވައުދު ގޯނި އޮއްސާލާ މަންޒަރު އެބަފެނެއެވެ. މި މަންޒަރު ފެންނައިރަށް ހަމަ ހިތައް އަރައެވެ. މި ވެރިޔާ ހަމަ ހަގީގަތުގައިވެސް ދަރިވަރުވީ ރައީސް ޔާމީންގެ އަރިހުންބާއޭވެ. އަޅުގަނޑުގެ ޒަމީރު މިކަމެއް ގަބޫލެއް ނުކުރަމެވެ. ރައީސް ޔާމީން އަކީ ވެވަޑައިގެންނެވި ކޮންމެ ވައުދެއް ފުއްދަވައި ދެއްވި، ރައްޔިތުންގެ ހައްގުގައި ވެރިކަން ކުރެއްވި ވެރިއެކެވެ.  ރައީސް ޔާމީނާ ރައީސް މުއިއްޒާ އަޅައި  ވެސް ނުކިޔޭނެއެވެ.

ނިމިދިޔަ ރިޔާސީ އިންތިޚާބްގެ ދުވަސްވަރެވެ. ގއ. ގެމަނަފުއްޓަށް ރައީސް މުއިއްޒު ވަޑައިގެން ދެއްކެވި ވާހަކަތައް ސަމާލުކަމެއްދިން އިރު އަންނަނީ ހޮރު ހޮރު ތަކުގައި ފިލައިގެންތިބި ހިނިތަކެވެ. އެ ރަށުގެ ޕޯޑިއަމްގައިވެސް ރައީސް ޔާމީންގެ ނަންފުޅު ރަައީސް މުއިއްޒު ފާހަގަކުރެއްވީ ކިތައް ފަހަރުކަން ބުނެދޭންވެސް ދައްޗެވެ.

ދެންވެސް ވިދާޅުވީ އެމަނިކުފާނުގެ ޒައާމަތުގައި ހައުސިންގ މިނިސްޓަރަކަށް ހުންނަވާ  ގއ. ގެމަނަފުށީގެ ބަނދަރު ތަރައްގީ ކުރި ވާހަކައެވެ. އަދި ވެރިކަން ލިބިއްޖާ ތަރައްގީ ކުރާނެ ވާހަކައެވެ.  ވެރިކަން ލިބިއްޖެއެވެ. ވެރިކަމުގެ ހުވާ 2023 ވަނަ އަހަރުގެ ނޮވެމްބަރު މަހުގެ 17 ވަނަ ދުވަހު ކުރެއްވި ފަހުން ދެ ތިން މަސްވެއްޖެއެވެ. ބިލާހެއް ފަދަ މަޝްރޫއުތަކާއި ބަޖެޓްގައި ހިމަނުއްވާފައި ނުވާ މަޝްރޫއުތައް އިއުލާން ކުރެއްވުމުގައި އަވަދިނެތި އުޅުއްވި އިރު އެންމެ ފަހަރަކުވެސް ގެމަނަފުށީ ބަނދަރު ތަރައްގީ ކުރުމުގެ މާނާގައި ވާހަކައެއް ދައްކަވާފައި ނުވެއެވެ.

މަޖިލިސް އިންތިޚާބަށް  ކެމްޕެއިން ކުރައްވަމުން  އެ ރަށަށް ވަޑައިގެން އަނެއްކާވެސް ޓަސް ލައިފަ މި ވައުދުވެވަޑައިގަތީ އެެއްކަލަ ބަނދަރު ތަރައްގީ ކުރާނެ ވާހަކައެވެ.  އެ ތަނުގައި ތިބިހާ ރައްޔިތުން ހަމަ ތިބީ ހައިރާންވެ އަންތަރީސްވެފައެވެ. ރައީސްގެ ވާހަކަފުޅަށް އަތްޖަހާލީ ރައީސް އެ ރަށުގައި ގެންގުޅުއްވާ ދެތިން ބޯއީސް އެވެ. ވާނީވެސް އެހެންތާއެވެ. އެއްކަލަ ރައްޔިތުން އުންމީދުކޮށްގެން ތިބީ ބަނދަރުގެ މަސައްކަތް ކުރަން ބަޔަކާ ހަވާލު ކުރި ވާހަކަ އިއުލާން ކުރާނެކަމަށެވެ. އޭގެ ބަދަލުގައި ރައީސް މި ބެލީ އަނެއްކާވެސް ހަމަ ކުރިން ފަހަރު ވެވަޑައިގެންނެވި ވައުދު ވެލާފައި ނިންމާލަންށެވެ.

އަދުގެ ސަރުކާރެކޭ  ނިމުނު ސަރުކާރެކޭ ހުރީ ވަކި ކޮންތަފާތެއްހެއްޔެވެ؟ އެ ސަރުކާރުންވެސް އޮއްސާލީ ވައުދު ގޯންޏެކެވެ. މި ސަރުކާރުން އޮއްސަމުނެ މިދަނީ ހަމައެފަދަ ވައުދު ގޯންޏެކެވެ.