ރައްޔިތުންގެ މަޖިލީހުގައި ތިއްބަވާ ޕީއެންސީ މެންބަރުން ބޭނުންވާނަމަ ގާނޫނުއަސާސީ އިސްލާހުކޮށް، ރައީސުލްޖުމްޙޫރިއްޔާގެ ދައުރު 50 އަހަރަށް ވެސް ބަދަލުކުރެވިދާނެ ކަމަށް މާފަންނު ދެކުނު ދާއިރާގެ ޕީއެންސީ މެންބަރު އަބްދުﷲ ރިފާއު މިއަދު ވިދާޅުވެއްޖެ އެވެ.

އާއްމު ރައްޔިތުންގެ ހިޔާލު ހޯދުމުގެ އާއްމު ވޯޓު ނެގުމުގެ ބިލަށް ބަހުސްކުރައްވަމުން މެންބަރު ރިފާއު ވިދާޅުވީ މިއަދު ޕީއެންސީ މެންބަރުން ބޭނުންވެއްޖެނަމަ ރައީސުލްޖުމްހޫރިއްޔާގެ ޓާމް ވެސް "ދުއްވާލެވިދާނެ" ކަމަށެވެ. އަދި މިވަގުތު ގާނޫނުއަސާސީ އޮތް ގޮތުން ރައީސުލްޖުމްހޫރިއްޔާގެ ޓާމަކީ 15 ނުވަތަ 50 އަހަރަށް ވެސް ހެދިދާނެ ކަމަށް ށެވެ.

ރިފާއު ރައީސް މުއިއްޒުގެ ރިޔާސީ ދައުރު ދަންމާލެވިދާނެ ކަމުގެ އިންޒާރު ދެއްވިއިރު މިފަދަ ވާހަކަތަކެއް ރާއްޖޭގެ ސިޔާސީ ވެށީން އިވޭތާ ވެސް ދުވަސް ކޮޅެއް ވެއްޖެ އެވެ. އެފަދަ ސައްލާތައް ރައީސް މުއިއްޒުގެ ވަފާތެރި މެންބަރުންނާއި އެކު އެކިފަހަރުމަތިން މަޝްވަރާ ކުރެއްވި ކަމުގެ އަޑުތައް ވެސް ވަނީ ކުރިން ފެތުރިފައި އެވެ. އަދި ރިޔާސީ ދައުރަށް 5 އަހަހރު ކުރުކަމުގެ ޝަކުވާ ވެސް ރައީސް މުއިއްޒު ހިމެނޭހެން އެމނަިކުފާނުގެ ސިޔާސީ މިތުރުން އަންނަނީ ބުނަމުން ނެވެ.

ރައްޔިތުންގެ މަޖިލީހުގައި ޖުމުލަ 93 މެންބަރުން ތިއްބަވާއިރު އޭގެ ތެރޭގައި ޕީއެންސީގެ 75 މެންބަރުން ހިމެނިވަޑައިގަންނަވަ އެވެ. އެހެންކަމުން ފަސޭހަ ކަމާއެކު ގާނޫނުއަސާސީ އިސްލާހު ކުރުމުގެ ބާރު އެ ޕާޓީއަށް އެބައޮތް ކަމަށާއި ވެރިކަން ކުރަން ވައުދު ފުއްދަން ފަސް އަހަރު މަދު ކަމަށް މަޖިލީހުގެ ރައީސް އަބްދުއްރަހީމް ވެސް މިފަހުން ވަނީ ވިދާޅުވެފައި އެވެ. އެހެން ކަމުން އިތުރު ދައުރެއް ނުވަތަ އިތުރު މުއްދަތުގައި މުއިއްޒު ވެރިކަމުގައި ބެހެއްޓެވުމަށް ވެސް އަބްދުއްރަހީމް އަންނަނީ ވަކާލާތު ކުރަމުން ނެވެ.

ރައީސް މުއިއްޒު ރިޔާސީ ދައުރު ދަންމާލުމަށް "އަޑިން" މަސައްކަތް ކުރައްވާއިރު އިތުރު ދައުރަކަށް ނިކުންނަވައިފި ނަމަ ވޯޓުން އެމަނިކުފާނުގެ ވެރިކަމުން ދުރުކުރާނެ ކަމަށް ގިނަ ރައްޔިތުން މިހާރު ވެސް އަންނަނީ ބުނަމުން ނެވެ.