ކުރިޔަށް އޮތް 24 ގަޑިއިރު ރާއްޖޭގެ ކަނޑުތައް ގަދަވެ، ވައި ބާރުވެ އުދައަރާފާނެ ކަމަށް ލަފާކުރެވޭ ކަމުގައި މޫސުމާއި ބެހޭ ގައުމީ އިދާރާ އިން ހާމަކޮށްފިއެވެ.
ކުރިޔަށް އޮތް 24 ގަޑިއިރު ގުގުރުމާއެކު ރާއްޖޭގެ އެކި ހިސާބުތަކަށް ވާރޭވެހުން އެކަށީގެންވާ ކަމަށާއި މެދު ރާއްޖެތެރެއާ އުތުރަށް ގަޑިއަކު 13 މޭލާއި 23 މޭލާ ދެމެދުގެ ވައިބާރުވާނެ ކަމަށް ބުނެފައި ވެއެވެ. މީގެއިތުރުން ރާއްޖޭގެ ދެކުނަށް އަށް މޭލާ 18 މޭލާ ދެމެދުގައި ވައި ޖެހޭނެ ކަމަށެވެ.
އުތުރާއި މެދުރާއްޖެތެރޭގެ ކަނޑުތައް ގަދަވާނެ ކަމަށާއި ކުރިއަށް އޮތް ދެ ދުވަހު ރާއްޖޭގެ އެކި ހިސާބުތަކަށް ކެރީގެ އަސަރު ކުރުން އެކަށީގެންވާ ކަމަށް ވެސް ހާމަކޮށްފައި ވެއެވެ.
އަދި ދިޔަވަރު ބޮޑުވާ ގަޑިތަކުގައި އުތުރާއި މެދުރާއްޖެތެރޭގެ ރަށްތަކަށް އުދައެރުމުގެ ފުރުސަތު އޮތް ކަމުގައި މެޓް އޮފީހުން ހާމަކޮށްފައި ވެއެވެ.
މެދު ރާއްޖެތެރެ އާއި އުތުރުގެ ކަނޑުތައް ގަދަވާނެ ކަމަށާއި އެ ސަރަހައްދުގެ ރާޅުގެ އުސްމިން ހަތް ފޫޓަށް އަދި ރާއްޖޭގެ ދެކުނުގެ އަތޮޅުތަކުގެ ރާޅުގެ އުސްމިނުގައި ތިންފޫޓާއި ފަސް ފޫޓު ހުރުން އެކަށީގެންވާ ކަމަށް މެޓުން ހާމަކޮށްފައި ވެއެވެ.
