މޫސުން ގޯސްވުމާއި ގުޅިގެން މުޅި ރާއްޖެއަށް އުދަ އެރުން އެކަށީގެންވާ ކަމަށް މޫސުމާ ބެހޭ ގައުމީ އިދާރާއިން މިއަދު ބުނެފިއެވެ.
މިއަދު 14:00އިން 18:00އަށް މުޅި ރާއްޖެއަށް ހުދު ސަމާލު ނެރެ، އުދަ އެރުން އެކަށީގެންވާތީ ސަމާލުވުމަށް މޫސުމާ ބެހޭ ގައުމީ އިދާރާއިން ވަނީ އިލްތިމާސްކޮށްފައެވެ.
މެޓް އޮފީހުން ހާމަކޮށްފައި ވާގޮތުގައި މިއަދު މާލެ ސަރަހައްދުގެ އެކި ހިސާބަށް ވިއްސާރަކުރުމާއެކު ގުގުރާނެ ކަމަށް ލަފާކޮށްފައި ވެއެވެ. އަދި ކަނޑު ގަދަ ވާނެ ކަމަށާއި ރާޅުގެ އުސްމިން 4 ފޫޓާއި 7 ފޫޓު ހުރުން އެކަށީގެންވާ ކަމަށް އެ އިދާރާއިން ބުންޏެވެ.
އިއްޔެ މޫސުމާ ބެހޭ އިދާރާއިން ނެރުނު އިއުލާނެއްގައި ވަނީ، މިއަދުން ފެށިގެން ހަތަރު ދުވަހު ރާއްޖެ ސަރަހައްދަށް ހުޅަނގު މޫސުމުގެ ބާރުގަދަވާނެ ކަމަށް ބެލެވޭ ކަމަށް ބުނެފައެވެ. އެހެންކަމުން ވައި ބާރުވެ، ކަނޑުތައް ގަދަވެ، ރާއްޖޭގެ ބޮޑު ބަޔަކަށް ވިއްސާރަކުރާނެ ކަމަށް ލަފާކުރެވޭ ކަމަށް އެ އޮފީހުން ބުންޏެވެ.
މެޓް އޮފީހުން ވަނީ ރާއްޖޭގެ ބޮޑުބަޔަކަށް ވިއްސާރަކުރުމާއެކު ގުގުރާނެ ކަމަށް ވެސް ބުނެފައެވެ.
މޫސުން ގޯސްވެ، ކަނޑުމަތީގައާއި އެއްގަމުގައި ވެސް މީގެ ކުރިން ހިތާމަވެރި ހާދިސާތައް ހިނގާފައި ވާތީ މޫސުމަށް ސަމާލުވުން މުހިންމެވެ.
