ޗައިނާ މޯލްޑީވްސް ފްރެންޑްޝިޕް ބްރިޖް ނުވަތަ ސިނަމާލެ ބްރިޖަކީ ޖަސްޓިފައިޑް ބްރިޖެއް ކަމަށް ރައީސް އަބްދުﷲ ޔާމީން އަބްދުލްގައްޔޫމް ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ ޕީއެންއެފް އިން ކުރިއަށް ގެެންދާ ފްރޮންޓް އޮފީސް ޖަލްސާގައި ވާހަކަދައްކަވަމުންނެވެ.

ރައީސް ޔާމީން މިފަދައިން ވިދާޅުވީ ޖީއެމްއާރް މައްސަލައިގައި އެމްޑީޕީގެ ޗެއާޕާސަން ފައްޔާޒު އިސްމާޢީލް އެމަނިކުފާނަށް ވަރަށް ބޮޑަށް ފާޑު ވިދާޅުވުމާއި ގުޅިގެން ފައްޔާޒަށް ރައްދު ދެއްވަމުންނެވެ.

ސިނަމާލެ ބްރިޖަކީ ދެ އާބާދީއެއް ގުޅުވާދިން ބްރިޖެއް ކަމަށާއި މި ބްރިޖްގެ ސަބަބުން ދިވެހީންނަށް ލިބިގެން ދިޔަ ލުއި ފަސޭހަކަމުގެ އިތުރުން ގައުމަށް ގިނަ އިންވެސްޓްމަންޓްތަކަށް ފުރުސަތު ހުޅުވާލަދިން ބްރިޖެއް ކަމަށް އެމަނިކުފާނު ވިދާޅުވިއެވެ.

މީގެ އިތުރުން، ސިނަމާލެ ބްރިޖް އެޅުމަށް ޖުމްލަ ޚަރަދުވީ 68 މިލިއަން ޑޮލަރު ކަމަށާއި 2 ޕަސެންޓްގެ އިންޓްރެސްޓް އާއި އެކު 25 އަހަރަށް ބެހިގެން އަޅާފައިވާ ބްރިޖެއް ކަމަށް ރައީސް ޔާމީން ފާހަގަކުރެއްވިއެވެ.

600 މިލިއަން ޑޮލަރަށް އިންޑިއާއަށް ދިވެހިރާއްޖެ އަޅުވެތިކޮށްގެން އެމްޑީޕީ ވެރިކަމުގައި އަޅަން ފެށުނު މި ބްރިޖް އަދިވެސް ނުނިމޭއިރު އިންޓްރެސްޓް ރޭޓެއް އަދި ނިމޭނެ ތާރީޚެއް އެގިލައްވާ ބޭފުޅަކުވެސް ނެތް ކަމަށް އެމަނިކުފާނު ވިދާޅުވިއެވެ.

ރައީސް ނަޝީދުގެ ވެރިކަމުގައި، ގައުމީ އެއާޕޯޓް ހިންގުން އިންޑިޔާގެ ޖީއެމްއާރު ކުންފުންޏާ ހަވާލުކޮށްފައިވަނިކޮށް، އެ އެއްބަސްވުން ރައީސް އަބްދުالله ޔާމީން އަބްދުލްޤައްޔޫމްގެ ވެރިކަމުގައި ބާޠިލް ކުރުމުން ގައުމުގެ ދަރަނީގެ ބޮޑު ޕަސެންޓެއް އެއާޕޯޓުން ހިއްސާ ކުރާ ކަމަށް ބުނެ އެމްޑީޕީގެ ޗެއާޕާސަން ފައްޔާޒު ރައީސް ޔާމީނަށް ވިދާޅުވި ފާޑުކިޔުންތަކަށް އެމަނިކުފާނު ވަނީ ހިސާބު އަދަދުތަކާއި އެއްކޮށް ފައްޔާޒަށް އެ މައްސަލަ "ޖަސްޓިފައިޑް" ކޮށްދީފައެވެ.