ރައްޔިތުން އެހާ ދަތި ހާލުގައި ތިބި އިރު، ވެލާނާ އިންޓަނޭޝަނަލް އެއާޕޯޓު (ވީއައިއޭ)ގެ އާ ޓާމިނަލް ހުޅުވަން އެހާ ބޮޑު ހޭދައެއް ކުރުމުން ރައީސް އަބްދުﷲ ޔާމީންގެ ނުރުހުން އަމާޒުކުރައްވައިފިއެވެ.

ބުރާސްފަތި ދުވަހުގެރޭ ބޭއްވި ޕީއެންއެފް ޖަލްސާގައި ވާހަކަފުޅު ދައްކަވަމުން އެއާޕޯޓު ޓާމިނަލް ހުޅުވަން ސަރުކާރުން ބޮޑު ހޭދައެއް ކުރައްވީތީ އެމަނިކުފާނު ކަންބޮޑުވުން ފާޅުކުރެއްވިއެވެ.

އެގޮތުން އެމަނިކުފާނު ވަނީ ރައްޔިތުން މިއަދު ތިބީ ވަރަށް އާންމު ހާލަތު ދަށްކޮށް ކަމާ އެހެންކަމުން ޓާމިނަލް ހުޅުވާއިރު ޝޯއަކުން ރައްޔިތުންނަށް ލިބޭނެ އުފަލެއް ނެތް ކަމަށް ވިދާޅުވެ ނުރުހުން އަމާޒުކުރައްވާފައެވެ.

މިނިވަންކަން ރާއްޖޭގައި އޮތް ނަަމަވެސް، އެ ހާލުގައި އުޅޭ ރައްޔިތު މީހާއަށް އެއީ އުފާވެރިކަމަށް ނުވާ ދަރަޖައަށް ކަންކަން ގޮސްފައިވާ ކަމަށް ރައީސް ޔާމީން ވިދާޅުވި އެވެ. އަދި އެ ހާޅުގައި އުޅޭ މީހާއަށް މިހާރު "މިނިވަން ދުވަސް ދުވަސް އޮތަސް، ނެތަސް މައްސަލަކަށް ނުވާ" ކަމަށަވެސް އެމަނިކުފާނު ވިދާޅުވިއެވެ.

ރައީސް ޔާމީން އިތުރަށް ވިދާޅުވީ ހަވަޔާ ޑްރޯން ޝޯ ބޭއްވުމަށް ވުރެ ވެރިކަމަށް ވަޑައިގެންނެވުމަށް ރައްޔިތުންނަށްވީ ވައުދު ފުއްދަން އެ ފައިސާ ބޭނުންކުރުން މާ ބުުއްދިވެރި ކަމަށެވެ.