ގައުމަށް ފައިދާހުރި ކަންކަމަށް ވުރެ މުއިއްޒު ގެނެސްދެނީ ގެއްލުން ކަމަށް ޕީއެންއެފްގެ ޖެނެރަލް ސެކްރެޓަރީ މުހައްމަދު މަލީހް ޖަމާލް ވިދާޅުވެއްޖެއެވެ.

މަލީހް އެކްސްގައި ކުރެއްވި ޕޯސްޓެއްގައި ބުނެފައިވަނީ މުއިއްޒު އަކީ ވެރިކަމުން އިސްތިއުފާ ދޭން ޖެހިފައި ހުރި މީހެއް ކަމަށާއި ގައުމު ހިންގުމުގެ އެއްވެސް ގާބިލުކަމެއް ނެތް ކަމަށެވެ.

މިގޮތުން، މުއިއްޒު އަންނަނީ ޑިމޮކްރަސީގެ ރިވެތި އުސޫލުތައް ފުނޑުފުނޑުކޮށްލާ، ޝަރުއީ ދާއިރާއަތް އަތް ބާނާ، އިގްތިސާދީ ގޮތުން ގައުމު އިތުރަށް ހީނަރުކުރަމުންކަން މަލީހް ފާހަގަކުރެއްވިއެވެ.

މީގެ އިތުރުން، މި ސަރުކާރުން ވައުދުވަނީ ފުއްދުމަށް ކަމަށް ބުނި ބުނުމަށްވެސް މަލީހް ވަނީ ފާޑުވިދާޅުވެފައެވެ.

މުއިއްޒު އަތޮޅު ތެރެއަށް ކުރައްވާ ދަތުރުތަކުގައި އެއް ވައުދުތަކެއް އަންނަނީ ތަކުރާރު ކުރަމުންނެވެ. ވައުދު ފުއްދުމުގެ ނަމުގައި ރައްޔިތުން ހާލުގައި ޖައްސާ، ތަކުލީފުތައް އަންނަނީ ގިނަ ކުރަމުންނެވެ.

ޝަރުއީ ދާއިރާއަށް ނުފޫޒު ނުފޯރުވާނެ ކަމަށާއި ވެރިކަމަށް ހޮވޭ ދުވަހު ރައީސް ޔާމީން މިނިވަން ކުރައްވާނެ ކަމަށް ވީ ވައުދުވެސް ވީ ބޮޑު ދޮގަކަށެވެ.

އެހެންކަމުން މުއިއްޒު ފަދަ މީހަކަށް މިހާރު މި ގައުމުން ބުނާނީ “ނޯ” ކަމަށް މަލީހް ސިފަކުރެއްވިއެވެ.