އިންތިޚާބްތަކާ ދިމާކޮށް ބޭކާރު ވާހަކަތައް ދައްކާ މީހުން ގިނަވެއެވެ. ބޭކާރު ޚަރަދުތައް ކުރާ މީހުން އެކި އެކި ދިމާލުން ފާޅުވެއެވެ. ޕޯޑިއަމްތަކަށް އަރާ ބޭކާރު މީހުން ފެނެއެވެ. ކަމެއް ނުކުރެވުނަސް ނަމެއް އޮތީތީ ތިމާ ވަރުގެ މީހެއް ނެތިގެން ބައެއް މީހުން އުޅެއެވެ. އޭގެން މީހެއްގެ ވާހަކަ ދައްކައިގެން އެވާހަކަ ބޭކާރު ވެދާނެހެނެއް ހިޔެއްނުވެއެވެ.

ކުރިޔަށް މިއޮތީ 20 ވަނަ ރައްޔިތުންގެ މަޖިލިސް އިންތިޚާބެވެ. އެކި އެކި ކުލަތަކުގެ ސިޔާސީ ޕާޓީގެ ފަރާތްތައް ކެމްޕެއިންގައި އުޅުއްވާ މަންޒަރު ފެނެއެވެ. ނަމަވެސް ލޮލުގައި އަޅައިގަތީ ސަރުކާރުން ހާވާ ހަޑިއެވެ. ކެމްޕެއިނާ ދިމާކޮށް އަދުގެ ރައީސް މުއިއްޒު ރާއްޖޭގެ ރަށްރަށަށް ކުރައްވާ ދަތުރުތަކުގައި ސަރުކާރުގެ ވަޒީރުންނާ ކުންފުނިތަކުގެ އިސް ފަރާތްތަކުން ބައިވެރިވެގެން އުޅެއެވެ.

ހީވަނީ މިވެރިންނަށް އީދެއް އައިސެްގެން އުޅޭހެންނެވެ. މޫނުތަކުގައި ކުލަ ހާކައިގެން އަންހެން ބޭފުޅުން ތިއްބަވާއިރު އެކި އެކި ކުލައިގެ ދަބަސްތައް ހިފައިގެން ފިރިހެން ބޭފުޅުން އުޅުއްވައެވެ.ރައީސް އާއެކު ޕިކްނިކް ހަދާލާ މަންޒަރު ބަލާލަން ވަރަށް ހުތުރެވެ.ފައިސާ އަޅާ ގަހެއް ހުރި ކަމަށް ހީކޮށްގެން ކަންނޭނގެ މިވެރިން ފައިސާ ތަޅާ ބާލަނީ، އެހެންކަމަށް ބަލާ ނިންމާލާނީއެވެ.

ދެން އަނެއްކާވެސް ބޭކާރު ވާހަކަ ދައްކާ ފަރާތްތަކެވެ. އެކަމުން އޮސްކާރ އެވޯޑެއް ލިބޭނަމަ މިއަދު އެ އެވޯޑް އަދުރޭ އަށް ލިބޭނެއެވެ. ޕޯޑިއަމްތަކަށް އަރައިގެން ހަޅޭ ފަޅޭ ޖެހުމަކީ އަދުރޭގެ ކަށީގައި ހިފާފައި ހުރިކަމެކެވެ. މަގާމެއް ލިބުމުންވެސް ނުފުދިގެން މަޖިލީހަށް ކުރިމަތި ލައިގެން އުޅެނީ މަޖިލިސް ރައީސްގެ މަގާމްގެ ދަހިވެތިކަމުގައި ކަމަށް ބަޔަކު ކިޔާތީ އަޑުއިވެއެވެ.

އަދުރޭގެ ވާހަކަވެސް ބާއްވާފައި، ދެން ބަލާލާއިރު މި ފެންނަނީ ރައީސް މުއިއްޒެވެ. ޕޯޑިއަމެއް ނުފެނިފައި ހުންނަނީ ކަމެއް ނުވަތަ ބޭކާރު ވާހަކަ ދައްކައިގެން ރައްޔިތުން ގުނބޯ ހައްދަން އުޅެނީ ކަމެއް ނޭނގެއެވެ. އެމްޑީޕީގެ ވެރިންވެސް ޖަހަނީ މި ސަކަރާތެވެ. ކޮބައިތޯ ތަފާތަކީ؟ އިބޫ ޞާލިހެކޭ ރައީސް މުއިއްޒެކޭ އެއްވެސް ތަފާތެއް ނެތްކަން މިއަދު ފެންފޮދެއްހާ ސާފެވެ.

ދެކުނުގެ ރަށްތަކަށް ދަތުރުކުރުމަށްފަހު ވިދާޅުވީ އެންމެ ތަރައްގީގެ ބޮޑު މަޝްރޫއު ހިންގާނީ އެ އަތޮޅުގައެވެ. މިހާރު އަނެއްކާ އުތުރަށް ވަޑައިގެން މި ވިދާޅުވަނީ އެ ތަނުގައޭ އެންމެ ބޮޑު ތަރައްގީގެ މަޝްރޫއު ކުރިޔަށް ދާނީ، ރައީސް މުއިއްޒުގެ މަގްސަދަކީ ރައްޔިތުން ހައްލާލައިގެން ވެރިކަން ކުރުން ކަން މިއަދު ކިތަންމެހާވެސް ސާފެވެ.

ރައީސެވެ. ރައީސް ހަމަ ޕީއެޗްޑީ ހާސިލްކުރެއްވީ ސިވިލް އިންޖީނިއަރިންގ އިންތޯއެވެ؟ ނުވަތަ ބޭކާރު ވާހަކަދެއްކެވުމުން ތޯއެވެ.؟ ވަރަށް ސުވާލު އުފެދެއެވެ. ސަބަބެއްވެސް ނެތިއެވެ. މިހާތަނަށް ދެއްކެވީ މުޅީންވެސް ބޭކާރު ވާހަކަތަކެވެ. ކުރައްވަނީ ރައްޔިތުންގެ ފައިސާއިން ބޭކާރު ޚަރަދެވެ.