“ޣައްޒާ ބަނޑަށް މަރުވަނީ” ގެ ނަމުގައި ހިނގާލުމެއް މިއަދު ބާއްވައިފިއެވެ.

އިސްރާ އެސޯސިއޭޝަން އާއި އިންޓަނޭޝަނަލް މުސިލިމާ އެސޯސިއޭޝަން އަދި އައިއޭސީ އިން އިސްނަގައިގެން އަންހެން ކަނބަލުންގެ ހިމޭން އިހުތިޖާޖެއް ގޮތަށް މި ހިނގާލުން ބާއްވާފައިވަނީ ރަސްފަންނު ސަރަހައްދުގައެވެ.

މިއަދު ހަވީރު 4:15 ގައި ފެށިގެން ދިޔަ ހިނގާލުމުގައި ގިނަ އަދަދެއްގެ އަންހެނުންނާއި ކުޑަކުދިން ބައިވެރިވެފައިވެއެވެ.

ރަސްފަންނު ސަރަހައްދުން މި އިހުތިޖާޖު ފަށައިގެން ނިންމާލާފައިވަނީ ރާޅުގަނޑު ސަރަހައްދަށެވެ.

ސަހްޔޫނީން ޣައްޒާއަށް ހަމަލާދީ ޣައްޒާ ވަށާލައި ބަނޑުހައިހޫނުކަމުގައި އަންނަނީ އެމީހުން ޝަހީދުކުރަމުންނެވެ.

އަދި ޣައްޒާގެ ރައްޔިތުންނަށް އެހީ ފޯރިކޮށްދޭ ޖަމާއަތްތަކަށްވެސް އަމާޒުކޮށް ސަހްޔޫނީން އަންނަނީ ހަމަލާތައް ދެމުންނެވެ.

މިއަދުގެ ހިނގާލުން ރާވާފައިވާ ޖަމިއްޔާތަކަކީ ފަލަސްތީނުގެ ރައްޔިތުންގެ ހައްގުގައި ހުއްޓުމެއްނެތި ވަކާލާތުކުރަމުން އަންނަ ޖަމިއްޔާތައްކަން ފާހަގަކުރެވެއެވެ.