ރައީސް ޑރ މުހައްމަދު މުއިއްޒުގެ ގަޓު ހުންނެވިނަމަ ގައުމު ލޫޓުވާ ކޮރަޕްޓް މީހުންގެ މައްޗަށް މަރުގެ އަދަބު ގާއިމުކުރުމަށް ރައީސް ޔާމީންގެ އިސް ގާނޫނީ ވަކީލު ޑރ މުހައްމަދު ޖަމީލް ވިދާޅުވެއްޖެއެވެ.

ޑރ. ޖަމީލް އެކްސް އެކައުންޓްގައި މިއަދު ކޮށްފައިވާ ޕޯސްޓެއްގައި ބުނެފައިވަނީ މަރުގެ ހުކުމް ތަންފީޒުކުރުމުގެ ވާހަކަ މުއިއްޒު ދައްކަވާ ކަމަށާއި މުއިއްޒުގެ ކެރިވަޑައިގަންނަވާ ނަމަ މި ގައުމަށް ތަކުރާރުކޮށް ޖެހިފައިވާ އެންމެ ބޮޑު ވަބާ ކަމަށްވާ ގައުމު ލޫޓުވާ ކޮރަޕްޓް މީހުންގެ މައްޗަށް މަރުގެ އަދަބު އިއްވުމަށް އެމަނިކުފާނު ގޮވާލާފައިވެއެވެ.

ޗައިނާ ފަދަ ގައުމުތަކުންވެސް ނުޙައްގުން ހޯދާ މުއްސަދިކަމަށް ދެނީ މަރުގެ އަދަބު ކަމަށާއި މި ކުޑަ ކުޑަ ރާއްޖޭގައި މިފަދައިން އަމަލުކުރެވިގެންދާނަމަ ކޮރަޕްޝަނާއި ބޮޑެތި ޚިޔާނާތުގެ ވަބާއިން ގައުމު ސަލާމަތްކުރެވިގެންދާނެ ކަމަށް ޑރ. ޖަމީލް ފާހަގަކުރެއްވިއެވެ.

ޑރ. ޖަމީލް މިފަދައިން ފާހަގަކުރައްވާފައިވަނީ ބާރަށު ދާއިރާގެ މެމްބަރު އިބްރާހިމް ޝުޖާއުގެ ކޮރަޕްޝަން މައްސަލަތަކެއް ފެންމަތިވެފައި ވަނިކޮށެވެ. މި މައްސަލައިގައި ސަރުކާރުގެ ބައިވެރިން ހިމެނިފައިވާއިރު، ޚުދު މުއިއްޒުގެ ޝާމިލުވުންވެސް އޮތް ކަމަށް ލީކުވެފައިވާ ރިޕޯޓްތަކުން ދައްކައެވެ.

ޤައުމެއް މިމިންވަރަށް ލޫޓްވާން ވެރިޔަކު ޖާގަ ދޭތަނެއް ވާނީ ފަގީރު ކަމަށާ ރައްޔިތުން މަގުމަތީގައި ސަލާންޖަހަން މަޖްބޫރުވާނެ ކަމަށް ވެސް ޑރ ޖަމީލު ވަނީ ވިދާޅުވެފައެވެ.