ކުރީގެ އުއްތަމަ ފަނޑިޔާރު މުއުތަސިމް އަދުނާން މަގާމުން ރިޓާޔަރ ކުރެއްވިތާ މާކަ ގިނަ ދުވަސްނުވެ އޭނާއަށް އެރުވި ނިޝާން އިއްޒުއްދީންގެ އިއްޒަތުގެ ވެރިކަމުގެ އިއްޒަތް އެއީ ފަނޑިޔާރުންނާ މެދު ސަރުކާރުން އެޅި ފިޔަވަޅުތަކަށް އޭނާ ހަނު ހުންނެވުމުން ދިން އިނާމެއްގެ ގޮތުގައި ރައީސް އަބްދުﷲ ޔާމީން ސިފަކުރައްވައިފިއެވެ.

އާދިއްތަ ދުވަހުގެރޭ ޕީއެންއެފުން ބޭއްވި ޖަލްސާގައި ވާހަކަފުޅު ދައްކަވަމުން ރައީސް ޔާމީން ވަނީ، މުއުތަސިމްއަށް އެ ޝަރަފު ހައްގުނުވާ ކަމަށާ ސަބަބަކަށް ވިދާޅުވީ ރައްޔިތުންގެ މަޖިލީހުގެ މެމްބަރުކަމުގެ ގޮނޑިއާ ގުޅޭ ގޮތުން ސުޕްރީމް ކޯޓަށް ހުށަހަޅާފައިވާ ހައްސާސް މައްސަލައެއް އޮއްވައި އެ މައްސަލާގައި އުއްތަމަ ފަނޑިޔާރުގެ ހައިސިޔަތުން ބަހެއް ވިދާޅުނުވެ އަދި އެކަމާ ގޮތެއް ވެސް ނުނިންމަވާ ހުންނެވުމަށް ފަހު މަގާމުން ރިޓަޔާކުރެއްވުމުން ކަމަށެވެ.

ރައީސް ޔާމީން ތުހުމަތު ކުރެއްވި ގޮތުގައި ނިޝާން އިއްޒަތުގެ ޝަރަފުގައި މުއުތަސިމުގެ ކަރުގައި އެޅުއްވި ހާރަކީ އެކަމަށް ރައީސް މުއިއްޒު ދެއްވި އިނާމެއް ކަމަށެވެ.

ރައީސް ޔާމީން ވިދާޅުވީ މިއަދު ރާއްޖޭގެ މުޅި ނިޒާމު އޮތީ އޮވާހޯލްކޮށް ރީބޫޓުކުރަން ޖެހިފައި ކަމަށެވެ.