މިއަދު ވެރިކަމުގައި ތިބީ ރައީސް މުއިއްޒުއާއި މުއިއްޒުއަށް ތާއީދުކުރައްވާ މީހުން ކަމަށާއި އެމީހުން ކުރާ ވައްކަން މިއަދު އަންނަނީ ފެނިގެން ކަމަށް ކުރީގެ ނައިބު ރައީސް ޑރ މުހައްމަދު ޖަމީލު އަހުމަދު ވިދާޅުވެއްޖެއެވެ.

އާދިއްތަ ދުވަހުގެރޭ ޕީއެންއެފުން ބޭއްވި ޖަލްސާގައި ވާހަކަފުޅު ދައްކަވަމުން ޑރ ޖަމީލު ވިދާޅުވީ، ކުރީ ސަރުކާރުން ކޮށްފަ ހުރި މައްސަލަތައް ހައްލުކުރަން ވައުދުވެގެން، އައި ނަމަވެސް މިއަދު ކުރީ ސަރުކާރުގެ މައްސަލަތައް ދެއްކައި މިއަދުގެ އެއްވެސް މައްސަލައެއް ހައްލުކުރަން މި ސަރުކާރަކުން ނޫޅޭ ކަމަށެވެ.

ޑރ ޖަމީލް ވިދާޅުވީ ރާއްޖެ ފަދަ ޑެވެލޮޕިންގ ޤައުމުތަކުގަ މި މިންވަރަށް ކަންތައްތައް ގޯސްވަނީ ގިނަފަހަރަށް ގަވަނެންސް ގޯސް ވުމުގެ ސަބަބުން ކަމަށެވެ. ވެރިކަމުގެ ނިޒާމު ގަޑުބަޑުވެ، ހަރާބުވެ އަމީނެއްގެ ބަދަލުގައި ހާއިނަކު އައީމައި ވާ ގޮތް ކަމަށް ވެސް ޑރ ޖަމީލް ވަނީ ފާހަގަކޮށްފައެވެ.

ޑރ ޖަމީލް އިތުރަށް ވިދާޅުވީ ބޭސް ފަރުވާ ނުލިބި ވެސް އެތައް ބަޔަކު މިއަދު ހާލުގައި ޖެހިފައި ތިބި ކަމަށެވެ.

ރާއްޖޭގެ އެކި ކަންކޮޅުތަކުގައި ރައްޔިތުން ހަނާވާތަން ފެނިގެންދާ ކަމަށް ޑރ ޖަމީލް ވިދާޅުވިއެވެ.