ގާނޫނޫ އަސާސީއަށް ބަދަލު ގެނެސް ކައުންސިލްތަކުގެ ބާރު ސަރުކާރުން ކަނޑުވާލުމާ ގުޅިގެން ކުޅުދުއްފުށި ސިޓީގެ މޭޔަރު މުހައްމަދު އާތިފުގެ ވަރުގަދަ ބަހުގެ ހަމަލާތަކެއް އަމާޒުކުރައްވައިފިއެވެ.

ކައުންސިލްތަކުގެ މާލީ ބާރު ހަނިކުރާ ބިލަށް އިސްލާހު ގެނެސް ސަރުކާރުން ބޭނުންވާ ގޮތަށް ކައުންސިލްތަކުގެ ބާރު ކަނޑުވާލާފައިވާތީ ކުޅުދުއްފުށީ ސިޓީ މޭޔަރ އާތިފު ވަނީ ކަންބޮޑުވުން ފާޅުކުރައްވާފައެވެ.

ރާއްޖެ ޓީވީގެ ޕްރޮގްރާމެއް ވާހަަކަ ދައްކަވަމުން މޭޔަރ އާތިފު ވިދާޅުވެފައިވަނީ، ޕީއެންސީގެ ސަރުކާރުން ލާމަރުކަޒީ ގާނޫނަށް ގެނައި އިސްލާހާއެކު އަރައިގެންފައިވަނީ ކައުންސިލްތަކުގެ އިންތިޚާބީ ހައްގަކަށް ކަމަށެވެ.

އެގޮތުން 2021 ވަނަ އަހަރު ކައުންސިލްތަކުގައި ތިބި އެންމެން އިންތިޚާބު ކުރީ 5 އަހަރުގެ ދައުރަކަށް ކަމަށް ވީ ނަމަވެސް މިހާރު ލާމަރުކަޒީ ނިޒާމަށް ސަރުކާރުން ގެންނަ ބަދަލާއި އެކު 5 އަހަރު ފުރިހަމައަށް މަސައްކަތް ކުރުމަށް ކައުންސިލްތަކަށް ފުރުސަތު ގެއްލިގެންދާ ކަމަށް އާތިފު ވިދާޅުވިއެވެ.

ދައުރުގެ ފަހުކޮޅު ގިނަ ކަންތައްތައް ކުރުމުގެ މަގު ބަންދުވާގޮތަށް ލާމަރުކަޒީ ޤާނޫނަށް އިސްލާހު ގެނެސްފައިވާ ކަމަށް ފާހަގަކުރައްވާ އާތިފް ވިދާޅުވީ، ކައުންސިލެއް ހުއްޓުވާލުމަށް ކުރެވޭނެ އެންމެ މުހިންމު ކަންތައްތައް ބިލު ފާސްކޮށް ސަރުކާރުން ވަނީ މަގު ފަހިކޮށްފައި ކަމަށެވެ.

މުއައްސަސާތަކާ ކައުންސިލްތައް ނުފޫޒުން އެއްކިބާވެފައި އޮންނަ ސަރުކާރެއް ހިންގާނެ ކަމުގެ ވައުދާ އައި ސަރުކާރުން ކައުންސިލްތަކުގެ ބާރު ކަނޑުވާލި ކަނޑުވާލުމާ މެދު ނުރުހުން ފާޅުކުރައްވާ އާތިފު ވަނީ ރިޔާސީ އިންތިޚާބުގައި ވެސް އެގޮތަށް ހަމަޖައްސަން ސަރުކާރަށް ކެރިވަޑައިގަންނަވާނެ ތޯ އައްސަވާފައެވެ.

މިހާރު ލާމަރުކަޒީ ޤާނޫަނަށް ހުށަހަޅާ ފާސްކޮށްފައިވާ އިސްލާހަކީ އުންސިލްތައް ހުއްޓުވާލުމަށް ކުރާ ކަމެއްގެ ގޮތުގައި އާތިފު ސިފަކުރައްވާފައިވެއެވެ.