5.4 މިލިއަން ރުފިޔާއަށް ބ. ކަމަދޫ ސްކޫލްގައި އެންމެ ދެ ކްލާސްރޫމް އަޅަން ފަހި ދިރިއުޅުން ކޯޕަރޭޝަނާއެކު އެއްބަސްވުމެއްގައި ސޮއިކޮށްފިއެވެ.

މި އެއްބަސްވުމުގައި ސޮއި ކުރީ މިހާރު ރައީސް ޑރ.މުހައްމަދު މުއިއްޒު ބ. އަތޮޅަށް ކުރައްވަމުން ގެންދަވާ ރަސްމީ ދަތުރުފުޅުގައި އެ ރަށަށް ވައުދުތައް ތަކުރާރު ކުރެއްވުމަށް ވަޑައިގެންނެވުމުން ބޭއްވި ރަސްމިއްޔާތެއްގައެވެ.

މިއެއްބަސްވުމުގައި އެޑިއުކޭޝަން މިނިސްޓްރީގެ ފަރާތުން ސޮއިކުރީ މިނިސްޓަރު އިސްމާއިލް ޝަފީއުއެވެ. އަދި ފަހި ދިރިއުޅުން ކޯޕަރޭޝަންގެ ފަރާތުން ސޮއިކުރީ މެނޭޖިން ޑިރެކްޓަރު ހަމްދާން ޝަކީލްއެވެ.

މި އެއްބަސްވުމުގެ ދަށުން ކަމަދޫ ސްކޫލަށް އިތުރުކުރާ ބައިގައި އަޅަނީ ދެ ކްލާސްރޫމް އެވެ. މި މަސައްކަތް އެފްޑީސީއާ ހަވާލުކުރީ 5.4 މިލިއަނަށެވެ.

ކަމަދޫ ރައްޔިތުންނާއި ބައްދަލުކުރައްވާ ވާހަކަ ދައްކަވަމުން މުއިއްޒު ވިދާޅުވީ އަލަށް އަޅާ ދެ ކްލާސްރޫމްގެ ސަބަބުން އެ ރަށު ސްކޫލަށް ދިމާވެފައިވާ ޖަގައިގެ ދަތިކަމާއި ވަސީލަތްތައް ނެތުމުގެ މައްސަލަ ހައްލުވެގެންދާނެކަމަށެވެ.

ރިޔާސީ އިންތިޚާބުގެ ދުވަސްވަރު ވެސް އެ ރަށު ސުކޫލުގެ ޖާގައިގެ ދަތިކަމަށް ހައްލެއް ގެނެސް ދެެއްވާނެކަމަށް މުއިއްޒު ވިދާޅުވި ނަމަވެސް ވެރިކަމަށް ދެ އަހަރުވާން ކައިރިވިއިރު އެކަން ކުރެވިފައި ނުވެއެވެ.

5.4 މިލިއަނަށްވުރެ ކުޑަ އަގެެއްގައި ދެ ކްލާސްރޫމް ގާއިމުކުރެވެން އޮތް އިރު އެ އަގުގައި ދެ ކުލާސްރޫމް އަޅަން އެފްޑީސީއާ ހަވާލުކުރުމުން ގިނަ ބަޔަކު އަންނަނީ މުއިއްޒުގެ ސަރުކާރަށް ފާޑުކިޔަމުންނެވެ.