ރައީސް ޔާމީން އަބްދުލްގައްޔޫމްގެ ލީޑަރޝިޕްގެ ދަށުން ފެއްޓެވި އިންޑިއާ އައުޓް ކެމްޕޭނަށް މާލީ ގޮތުން އެންމެ ބޮޑަށް ހަރަކާތްތެރިވީ މިހާރުގެ ރައީސް މުއިއްޒު ކަމަށް ރައްޔިތުންގެ މަޖިލީހުގެ ވިލިމާލޭ ދާއިރާގެ މިހާރުގެ މެންބަރު މުހައްމަދު އިސްމާއީލް ވިދާޅުވެއްޖެ އެވެ.

އިންޑިއާ އައުޓް ކެމްޕޭން ހަރަކާތްތަކަށް އަތޮޅު ތެރެއަށް ކުރެއްވި ދަތުރު ދަތުރުތަކުގައި އިސްމާއިލްގެ އިތުރުން މަޖިލީހުގެ ކުރީގެ މެންބަރު ޝިފާގު މުފީދު، ރައްޔިތުންގެ މަޖިލީހުގެ މިހާރުގެ މެންބަރު ހަސަން މުފީދު، މި ސަރުކާރުގައި ޑެޕިއުޓީ މިނިސްޓަރަކަށް ހުންނެވި ނަބީލް، ވެމްކޯގެ ޑެޕިއުޓީ މެނޭޝިން ޑިރެކްޓަރު ޝަހީދު އަދި އައްބާސް ބައިވެރިވި ކަމަށް އިސްމާއިލް ފާހަގަކުރިއެވެ.

މީޑިއާތަކާއި ވާހަކަދައްކަވަމުން އިސްމާއީލް ވިދާޅުވީ މި ކެމްޕޭނަށް ފައިނޭންޝިއަލީ އެންމެ ބޮޑަށް ހޭދަކުރެއްވީ ރައީސް މުއިއްޒު ކަމަށެވެ.

މާލެ ސިޓީގެ މޭުޔަރަކަށް މުއިއްޒު ހުންނެވިއިރު، މާލޭގެ ބިންތައް ދޫކޮށްލައިގެންނާއި މަގުތަކުން ޕާކިން ޒޯން ވިއްކައިގެން އަދި ސިޓީ ކައުންސިލުން ހިންގި މަޝްރޫއުތަކުން ކޮރަޕްޝަން ހިންގައި، މާލީ މަންފާ ހޯދާފައިވާ ކަމަށްވެސް އިސްމާއީލް ތުހުމަތުކޮށްފައިވެއެއެވެ.

މި މައްސަލަތައް އެއްވެސް އިދާރާއަކުން ބަލާ ފިޔަވަޅެއް އަޅާފައިނުވާއިރު، މި މަސައްލަތަކުގެ ހެކިވެސް މިހާރު ނައްތާލައިފައިވާ ކަމަށް ގިނަ ބަޔަކު ތުހުމަތު ކުރެއެވެ.

ރިޔާސީ އިންތިޚާބާއި ދިމާކޮށް އިންޑިއާ ސިފައިން ރާއްޖެއިން ބޭރުކުރާނެ ކަމަށް މުއިއްޒު ވައުދުވެ، ވެރިކަމާއި ހަވާލުވެ އިންޑިއާ ސިފައިން ރާއްޖޭގައި އެކި ނަން ނަމުގައި ބައިތިއްބާ އިންޑިއާގެ އަސްކަރީ އުޅަނދުތައް އަންނަނީ މި ގައުމަށް އެތެރެކުރަމުންނެވެ. މީގެ އިތުރުން، އައުޓް ކުރާނެ ކަމަށް ބުނި އިންޑިއާއާއި އިތުރަށް ގުޅުން ވަރުގަދަ ކުރާތަން ސަރުކާރުގެ ތެރެއިން އަންނަނީ ވަރަށް ބޮޑަށް ދައްކަމުންނެވެ.