ކައުންސިލްތަކަށް ލިބިދޭ ބާރުތައް ހަނިކުރާ އިސްލާހުގެ ބިލު ތަސްދީގުނުކުރަން 80 އަށްވުރެ ގިނަ ކައުންސިލްތަކުން އެދިފައިވަނިކޮށް، އެ ކައުންސިލުތަކުގެ އާދޭސްތަކަށް ބީރު ކަންފަތެއްދީ ލާމަރުކަޒީ ގާނޫނުގެ އިސްލާހު މުއިއްޒު ތަސްދީގުކުރައްވައިފިއެވެ.

ލާމަރުކަޒީ ގާނޫނަށް ހުށަހަޅާފައިވާ އިސްލާހާއި ދޭތެރޭ ކައުންސިލުތަކުން ކަންބޮޑުވުން ފާޅުކޮށް ނޫސް ބަޔާންތައްވެސް ނެރެފައިވާއިރު، މިދިޔަ ހަފްތާ ބުދަ ދުވަހު ބޭއްވި މަޖިލިސް ޖަލްސާގައި ވަނީ ސަރުކާރުގެ ސުޕަ މެޖޯރިޓީއާއި އެކު ފާސްކޮށްފައެވެ.

މަޖިލީހުން ބިލު ފާސްކޮށްފައިވީ ނަމަވެސް، ރައީސް މިހާރު އަތޮޅުތެރެއަށް ކުރައްވަމުންދާ ދަތުރުފުޅުގައި ކޮންމެ ރަށެއްގެ ކައުންސިލުން ކަހަލަ ގޮތަކަށް ރައީސް މުއިއްޒުގެ އަރިހުގައި މި ބިލު ތަސްދީގުނުކުރުމަށް އާދޭސް ދަންނަވާފައިވެއެވެ.

ތަސްދީގު ކުރެވުނު މި އިސްލާހާއި ގުޅިގެން ކައުންސިލްތަކަށް މުވައްޒަފުން ނެގުމާއި، ކައުންސިލްތަކުގެ އިހްތިސޯސުގައިވާ ފަޅާއި، ބިން ފަދަ ތަންތަން ކުއްޔަށް ދޫކުރުމުގެ އިތުުރުން ތަރައްގީގެ ޕްރޮޖެކްޓުތައް ހިންގުމުގައި ކައުންސިލްތަކަށް ލިބިދީފައިވާ ބާރު ހަނިވެފައިވެއެވެ.

އިސްލާހުގައިވާ ގޮތުން ސަރުކާރުން ރައްޔިތުންނަށް ފޯރުކޮށްދޭ އަސާސީ ޚިދުމަތެއް ފޯރުކޮށްދިނުމުގެ ބޭނުމަށް އެކި ފަރާތްތަކަށް ދޫކޮށްފައިވާ ބިމުން ނުވަތަ އިމާރާތުން ކުއްޔެއް ނުނެގޭނެއެވެ. އަދި ކައުންސިލްތަކަށް އާމްދަނީ ދޫކުރަން ވާނީ އެއްވެސް ގާނޫނެއްގެ ދަށުން ދައުލަތަށް ދައްކަންޖެހޭ އެއްވެސް ޓެކުހެއް ވާނަމަ އެ ޓެކުހަކަށްވާ ފައިސާއާއި، އާންމު ޚިދުމަތަކަށް ކައުންސިލްތަކުން ދައްކަންޖެހޭ ފައިސާއެއް ނުދައްކާތާ ހަ މަހަށްވުރެ ގިނަ ދުވަސްވެފައިވާނަމަ، އެ ފައިސާއެއް އުނިކުރުމަށްފަހު ބާކީވާ އަދަދެކެވެ.

މީގެ އިތުރުން އެ އިސްލާހުގައި ބުނެފައިވަނީ ކައުންސިލްތަކުން ހުޅުވާފައިވާ ބޭންކު އެކައުންޓުތައް ބަލަހައްޓަންވާނީ ފިނޭންސް މިނިސްޓްރީން ކަނޑައަޅާ އުސޫލާ އެއްގޮތަށް ކަމަށާއި، އެ އެކައުންޓުތަކުގެ ސްޓޭޓްމަންޓެއް ހޯދުމަށް އެ މިނިސްޓްރީން އެދިއްޖެ ހާލަތުގައި އެ މައުލޫމާތު ފޯރުކޮށްދޭންޖެހޭނެ ކަމަށެވެ.

ކައުންސިލުތަކުން ފާޅުކޮށްފައިވާ ކަންބޮޑުވުންތަކަށް މުއިއްޒު ވިދާޅުވީ މި އިސްލާހު ފާސްކޮށްފައިވަނީ ކައުންސިލުތަކުން އެ ކައުންސިލްތަކުގެ އެކައުންޓްތަކުގައި ހުންނަ ފައިސާ ނަހަމަ ގޮތުގައި ބޭނުން ކުރާތީ ކަމުގައެވެ.

ނަމަވެސް މިއީ ގައުމުގެ "ފުލް ކޮންޓްރޯލް" ސަރުކާރަށް ނެގުމަށް ނެގި ފިޔަވަޅެއް ކަމަށް ގިނަ ކައުންސިލުތަކުން އަންނަނީ ފާހަގަކޮށް ނުރުހުން ފާޅުކުރަމުންނެވެ.