ރައީސުލްޖުމްހޫރިއްޔާ މުހައްމަދު މުއިއްޒުއަކީ ދޮގުވެރިއެއްކަމަށް މުއިއްޒުއާއި އެންމެ ކައިރީގައި ހަރަކާތްތެރިވާ ބޭފުޅުންވެސް އެއްބަސްފުޅުވަ ކަމަށް ރައީސް ޔާމީންގެ އިސް ގާނޫނީ ވަކީލު ޑރ މުހައްމަދު ޖަމީލް ވިދާޅުވެއްޖެއެވެ.

ޕީއެންއެފްގެ ފްރޮންޓް އޮފީސް ޖަލްސާގައި ވާހަކަދައްކަވަމުން ޖަމީލް ވިދާޅުވީ މުއިއްޒު އާއި ކޯލިޝަން ހައްދަވާފައިވާ ސިޔާސީ ޕާޓީތަކުންވެސް 2023 ގެ ރިޔާސީ އިންތިޚާބާއި ދިމާކޮށް އެ ޕާޓީތަކުން ގޮތް ނިންމަވަން ބާއްވާފައިވާ ޖަލްސާތަކުގައި މުއިއްޒަކީ ދޮގުވެރިއެއް ކަމަށާއި އަދި މުއިއްޒު ވެރިކަމަށް ހޮވުމަކީ ހެދޭނެ ބޮޑު ގޯހެއް ކަމަށް ވިދާޅުވެފައިވާ ކަމަށެވެ.

ގައުމުގެ ސިޔާސީ މަސްލަހަތަށްޓަކައި ޕާޓީތަކުގެ ނަން ހާމަނުކުރައްވާ ޖަމީލް ވިދާޅުވީ އެ ބޭފުޅުންވެސް މުއިއްޒަށް ވޯޓު ދެއްވީ ރައީސް ޔާމީންގެ ހައްގުގައި އެމަނިކުފާނު މިނިވަންކޮށްދީ އެމަނިކުފާނަށް އިންސާފު ހޯއްދަވާދެއްވާނެ ކަމަށް މުއިއްޒު އެތަކެއް ފަހަރު މަތިން ވިދާޅުވެފައިވާތީއެވެ.

ރިޔާސީ އިންތިޚާބާއި ދިމާކޮށް ބާއްވާފައިވާ ރިޔާސީ ބަހުސްއަކީ އެ ކެންޑިޑޭޓުންނާއި ދިވެހި ރައްޔިތުންނާއި ދެމެދު ވެވޭ އަހުދެއް ކަމަށާއި މުއިއްޒުގެ ވާހަކަތަކަށް އިތުބާރުކުރައްވާ ރައްޔިތުން ދިން ވޯޓަށް މުއިއްޒު އިހުމާލުވެ ދިވެހި ރައްޔިތުންނާއި އެކު ވެފައިވާ އަހުދަށް ޚިޔާނާތްތެރިވެފައިވާ ކަމަށް ޖަމީލްގެ ވާހަކަފުޅުގައި ފާހަގަކުރައްވާފައިވެއެވެ.

މީގެ އިތުރުން، 05 އަހަރު ވަންދެން ރައީސް ޔާމީންގެ މައްޗަށް އެމްޑީޕީ ސަރުކާރުން ކޮށްފައިވާ ނުހައްގު ދައުވާތަކާއި އެމަނިކުފާނު ތަހައްމަލުކުރި އަނިޔާވެރިކަމަށް މުއިއްޒު އިންސާފު ގެންނާނެ ކަމަށް ދިވެހިރާއްޖޭގެ ހުރިހާ ރައްޔިތުން ގަބޫލުކުރެއްވި ކަމަށާއި ނަމަވެސް މުއިއްޒު ވަނީ އަމިއްލަ އެދުން އިސްކޮށް އެންމެ ކައިރީގައި ހުރެ އެމަނިކުފާނަށް ޚިޔާނާތްތެރިވެފައި ކަމަށް ޖަމީލް ސިފަކުރެއްވިއެވެ.