ކެއްސުމާއި ރޯގާއަށް ރާއްޖޭގައި އާއްމުކޮށް ދޭ އުޅޭ ބޭހެއް ކަމަށްވާ، "ކޮފްސީ ސިރަޕް" މަނާކޮށްފި އެވެ.

އާންމުކޮށް ކުޑަ ކުދިންނަށް ދޭ މި ބޭސް މަނާކުރިކަން ހާމަކޮށްފައިވަނީ ހެލްތު މިނިސްޓްރީއިން ނެރުނު އެލާޓެއްގައެވެ.

އެލާޓުގައި ބުނީ ރާއްޖޭގައި މިހާރު ވިއްކަން ހުރި ކޮފްސީ ސިރަޕުން ކޮލިޓީ މައްސަލައެއް ފާހަގަކުރެވިފައިވާ ކަމަށެވެ.

އެހެންކަމުން ބުދަ ދުވަހުން ފެށިގެން، އެ ބޭސް ރާއްޖެއަށް އިމްޕޯޓް ކުރުމާއި ވިއްކުމާއި ބޭނުން ކުރުމަކީ ވެސް މަނާކަމެއް ކަމަށް ބުންޏެވެ. އަދި އެއްވެސް ބޭސް ފިހާރައެއްގައި މި ބޭސް ހުރި ނަމަ، އުސޫލާ އެއްގޮތަށް ނައްތާލުމަށް އެލާޓުގައި ބުނެފައިވެއެވެ.

އެތަނުން ބުނިގޮތުގައި މި ބޭސް ބޭނުންކޮށްގެން ސިއްހީ މައްސަލައެއް ދިމާވި ކަމަކަށް މިހާތަނަކަށް އެތަނަށް ރިޕޯޓުކޮށްފައެއް ނުވެއެވެ.

ބޭހުގެ ރައްކާތެރިކަން ކަށަވަރުކުރުމަށްޓަކައި ބޭސް އެއްތަނުން އަނެއްތަނަށް އުފުލުމާއި ގުދަން ކުރުމުގައި ބަހައްޓަން ޖެހޭ މިންގަނޑުތަކަށް ސަމާލުވުމަށް ވެސް ހެލްތު މިނިސްޓްރީގެ އެލާޓުގައި ގޮވަލާފައިވެއެވެ.