ރައްޔިތުންގެ މަޖިލީހުގެ ސަރުކާރަށް ނިސްބަތްވާ މެމްބަރުން ރައްޔިތުންގެ ހައްގުގައި އަޑު އުފުލުމުގެ ބަދަލުގައި މަސައްކަތް ކުރަނީ ރައީސް މުއިއްޒުގެ ގެކޮޅު ވަށައި ބޯތަށި ހިފައިގެން ހިނގޭތޯކަމަށްް ކުރީގެ ނައިބު ރައީސް ޑރ މުހައްމަދު ޖަމީލް އަހުމަދު ވިދާޅުވެއްޖެއެވެ.

ޑރ ޖަމީލް މިފަދައިން ވިދާޅުވެފައި ވަނީ ބުރާސްފަތި ދުވަހުގެ ރޭ ޕީއެންއެފް އިން ވޭކް އަޕްގެ ނަމުގައި އާޓިފިޝަލް ބީޗްގައި ބޭއްވި ގައުމީ ބޮޑު އެއްވުމުގައި ވާހަކަފުޅު ދައްކަވަމުންނެވެ.

ޑރ ޖަމީލް ވަނީ މުއިއްޒު އަށާއި، ސަރުކާރަށާއި ރައްޔިތުންގެ މަޖިލީހުގެ ޕީއެންސީ މެމްބަރުންނަށް ފާޑު ވިދާޅުވެފައެވެ.

ޑރ ޖަމީލް ވިދާޅުވީ މުއިއްޒު އުޅުއްވަނީ "ގާނޫނީ ވެރިކަމެއް ކުރައްވަން ނޭނގިގެން" ކަމަށެވެ. ކޮންމެ ދިމާލަކަށް ބެލިއަސް ފެންނަނީ އެ މަންޒަރުކަމަށް ވިދާޅުވިއެވެ.

ޑރ ޖަމީލް ވިދާޅުވީ މީޑިޔާ ކޮންޓްރޯލް ކުރުމަށް މުުއިއްޒު އަތުކުރި އޮޅާ ލެއްވި އިރު ރިޔާސީ އިންތިޚާބުގެ ކެމްޕެއިން ދުވަސްވަރު ކިޔުއްވީ އެހެން ލަވައެއްކަަމަށެވެ.

މުއިއްޒުގެ ކުރިންވެސް ވެރިންތަކެއް އައި ކަމަށާއި މިހާ ހުދުމުހުތާރު ވެރިކަމެއް ކުރި ވެރިޔަކު ނުފެންނަކަމަށް ވިދާޅުވެ ޑރ ޖަމީލް ވަނީ މުއިއްޒަށް ފާޑު ވިދާޅުވެފައެވެ.