ރާއްޖޭގެ ހާއްސަ އިގްތިސާދީ ސަރަހައްދުން ގެއްލިގެން ދިޔަ ބައި އަނބުރާ ހޯދުމަށް މިހާރު ކުރަމުންދާ މަސައްކަތުގައި ބޮޑެތި ގޮންޖެހުންތަކެއް ކުރިމަތިވެފައިވާ ކަމަށް މި މައްސަލަ ދިރާސާ ކުރަމުންދާ ތަޖުރިބާކާރުންގެ ޓީމުގެ ދިރާސާގައި ފާހަގަކޮށްފިއެވެ.
އެމައްސަލައާ ގުޅިގެން ކުރަމުންދާ މަަސައްކަތްތަކާއި ގުޅޭ ފަހުގެ މައުލޫމާތު ހިއްސާ ކުރައްވަމުން އެޓާނީ ޖެނެރަލް އޮފީހުން (އޭޖީ)އިން މިއަދު ނެރުނު ބަޔާނެއްގައި ބުނެފައިވަނީ މި މައްސަލައާ ގުޅިގެން ގާނޫނީ ލަފާ ހޯދުމަށް އައްޔަނުކޮށްފައިވާ އިނގިރޭސިވިލާތުގެ ކިންގްސް ކައުންސެލްއަކާއި، ލޯ އޮފް ދަ ސީ އާ ބެހޭ މޯލްޓާގެ ކަމާބެހޭ ތަޖުރިބާކާރުގެ ލަފާ އެ އޮފީހަށް މިހާރު ލިބިފައިވާ ކަމަށެވެ.
މި މައްސަލައިގައި މިހާތަނަށް ލިބިފައިވާ ގާނޫނީ ލަފާތަކުގެ މައްޗަށް ބިނާކޮށް، މި މަސައްކަތްކުރުމަށް ބަންޑާރަނައިބު އުފައްދަވާފައިވާ ވިލަރެސް ކޮމިޓީން ތައްޔާރުކޮށްފައިވާ ރިޕޯޓް އެ އޮފީހަށް ލިބިފައިވާ ކަަމަށްވެސް ބަޔާނުގައި ވަނީ ބުނެފައެވެ.
އަދި މީގެ އިތުރުންވެސް، ކަނޑުތަކާ ބެހޭ ގާނޫނީ ދާއިރާގެ ހަބީރެއްގެ ހައިސިއްޔަތުން ކުރީގެ ބަންޑާރަނައިބު ޑރ މުޙައްމަދު މުނައްވަރުގެ ގާނޫނީ ލަފާ ހޯދުމުގެ މަސައްކަތްވެސް އެ އޮފީހުން ކުރަމުންދާ ކަމަށް ބަޔާނުގައި ފާހަގަކޮށްފައިވެއެވެ.
ކަނޑުން ބައެއް ގެއްލިފައިވަނީ ކުރީގެ ރައީސް އިބްރާހިމް މުހައްމަދު ޞާލިހް ގެ ސިއްރު ސިޓީފުޅުގެ ސަބަބުންނެވެ.
