މިނިވަން މީޑިއާ ނެތިކޮށްލުމުގެ ބޭނުމުގައި ސަރުކާރުން ފަހަތުގައި އޮވެގެން ރައްޔިތުންގެ މަޖިލީހަށް ހުށަހެޅި ބިލު ސިވިކަސް އިން ކުށްވެރިކޮށްފި އެވެ.

ރާއްޖޭގެ މަދަނީ ހައްގުތައް އޮތީ މިހާރު "ހުރަސްއެޅިފައި" އޮތް ހާލަތުގައި ކަމަށް ސިވިކަސް އިން ނެރުނު ބަޔާނުގައިި ވަނީ ބުނެފައެވެ.

ހޯމަ ދުވަހު މަޖިލީހަށް ހުށަހެޅި މީޑިއާ ނެތިކޮށްލާ ބިލުގެ ސަބަބުން ހައްގުތައް އިތުރަށް ފަހަތަށް ޖެހޭނެކަން ވަނީ ފާހަގަކޮށްފައެވެ.

ވަކިވަކި ނޫސްވެރިންނާއި ނޫސްތަކަށް ބިރުދެއްކުމާއި އިންޒާރުދިނުމުގެ މައްސަލަތަކެއް ވެސް ކުރިމަތިވެފައިވާކަން ސިވިކަސް އިން ވަނީ ފާހަގަކޮށްފައެވެ.

އޭގެ އިތުރުން، މުޒާހަރާކޮށް ހިޔާލު ފާޅު ކުރުމުގެ މިނިވަންކަމަށް ސަރުކާރުން ހުރަސްއަޅާތީ އެކަން ވެސް ސިވިކަސް އިން ފާހަގަ ކުރި އެވެ. އޭގެ ތެރޭގައި، ޒަކިއްޔާ މޫސާގެ މަރުގެ މައްސަލައިގައި ނ. ހޮޅުދޫގައި ކުރި މުޒާހަރާއަށް ހުރަސް އެޅުމާއި މެއި މަހުގެ ތެރޭގައި ކުރި ޒުވާނުންގެ މުޒާހަރާއިން ދެ މީހަކު ހައްޔަރު ކުރުން ހާއްސަ ގޮތެއްގައި ސިވިކަސް އިން ފާހަގަ ކުރި އެވެ.

ސިވިކަސްގެ އިތުރުން އިންޓަނޭޝަނަލް ފެޑެރޭޝަން އޮފް ޖާނަލިސްޓްސް، މޯލްޑިވްސް ޖާނަލިސްޓް އެސޯސިއޭޝަން އަދި މީޑިއާ ކައުންސިލުން ވެސް ވަނީ މީޑިއާ ނެތިކޮށްލާ ބިލު ކުށްވެރިކޮށް އެ ބިލު ބޭރު ކުރަން ގޮވާލައިފަ އެވެ.