ވެރިންކުރާ ވައްކަމާ ޚިޔާނާތާ ދެކޮޅަށް އަޑު އުފުލުމަކީ ޖިހާދު ކުރުންފަދަ މަތިވެރި ޢަމަލެއް ކަމަށް ކުރީގެ ނައިބު ރައީސް ޑރ މުހައްމަދު ޖަމީލް ވިދާޅުވެއްޖެއެވެ.

ޑރ ޖަމީލް އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ މީޑިއާގެ މިނިވަންކަމުގެ އަސާސަކީ ޙައްގު ބަސް ބުނުމުގެ މަތިވެރި ނަބަވީ އިރުޝާދު ކަމަށާއި ނަމަވެސް ޑރ މުއިއްޒުގެ ސަރުކާރުން އަންނަނީ ބަސް ބުނުގެ މިނިވަންކަން ރައްޔިތުންގެ ކިބައިން ނިގުޅައިގަންނަމުން ކަމަށް ޑރ. ޖަމީލް ސިފަކުރައްވާފައިވެއެވެ.

މީގެ އިތުރުން، މިހާރުގެ ދިވެހި މުޖުތަމައުއަކީ ހޭލުންތެރި އުގެނިފައިވާ ތަންދޮރު ދަންނަ ބަޔެއް އުޅޭ މުޖުތަމައުއެއް ކަމަށް ފާހަގަކުރައްވާ ޖަމީލް ވިދާޅުވީ ދިވެހިންގެ ޚިޔާލާ ވިސްނުމުގައި ކަސްތޮޅު އަޅަން އުޅޭ ކޮންމެ މީހަކު ވެއްޓޭނީ އަނގަވަތަށް ކަމަށެވެ.

ރާއްޖޭގެ މީޑިއާތަކާއި ނޫސްތަކުގެ ކޮންޓްރޯލް ނެގުމަށް "މީޑިއާ ކޮންޓްރޯލް ބިލް" މަޖިލީހަށް ވައްދާ ސަރުކާރުން އަންނަނީ ގައުމުގެ ހުރިހާ ބާރެއް ސީދާ މުއިއްޒުގެ އަތު ތެރެއަށް ލުމަށް މަސައްކަތް ކުރަމުންނެވެ. އޭގެ އެއް މިސާލަކީ އޯގަސްޓް 21 ވަނަ ދުވަހު ރައީސް އަބްދުﷲ ޔާމީން އަބްދުލްގައްޔޫމް ބައިވެރިވެވަޑައިގެންނެވި ޕީއެންއެފް ޖަލްސާގެ ވަގުތާއި ދިމާކޮށް ޗެނަލް13 ގެ ބްރޯޑްކާސްޓިންގ ކަނޑާލުމެވެ.

މުއިއްޒު އާއި މި ސަރުކާރުން ކުރަމުން އަންނަ ވިޔާނުދާ ކަންތައްތަކާއި، ވައްކަމާއި ޚިޔާނާތުގެ ވާހަކަ ދައްކާ ކޮންމެ މީހެއްގެ އަގަ ބަންދުކުރުމަށް މުއިއްޒު އަންނަނީ "ގައުމުގެ ރައީސް" ގެ މަގާމުގެ ނުފޫޒު ބޭނުންކޮށް ގާނޫނީ އިމުން ބޭރުން އަނިޔާވެރިވަމުން ކަމަށް ޖަމީލް ސިފަކުރެއްވިއެވެ.