މޯލްޑިވްސް މީޑިއާ އެންޑް ބްރޯޑްކާސްޓިން ރެގިއުލޭޝަންގެ ނަމުގައި ރައްޔިތުންގެ މަޖިލިހަށް ހުށަހަޅާފައިވާ ބިލު ބަލައިނުގަނެ ތަޅުމުން ބޭރުކުރުމަށް ގޮވާލާ ޕެޓިޝަނެއްގައި ސޮއިކުރަން ފަށައިފިއެވެ.
މިފަދަ ޕެޓީޝަނެއްގެ މަސައްކަތް ފަށާފައިވަނީ މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ) އިން އިސްނެގުމާ އެކުއެވެ.
ޕެޓިޝަންގައި ރާއްޖޭގެ އެކި މީޑިއާތަކުގައި މަސައްކަތް ކުރާ ނޫސްވެރިން ދަނީ ސޮއިކުރަމުންނެވެ. އަދި މީޑިއާތަކުގެ ނޫސްވެރިން ދަނީ އެ ބިލް މަޖިލީހުން ބޭރުކުރުމަށް ވެސް ގޮވާލަމުންނެވެ.
މިވަގުތު ޕެޓިޝަނުގައި ސޮއިކުރި މީހުންނަށް ބަލާއިރު، އޭގެ ތެރޭގައި ނޫސްވެރިކަމުގެ ދާއިރާގައި ގިނަ އަހަރުތަކެއްގެ ތަޖުރިބާ ލިބިފައިވާ، ރާއްޖޭގެ ބޮޑެތި ނޫސްތަކުގެ އެޑިޓަރުންނާއި ނޫސްވެރިން ހިމެނެ އެވެ. އަދި ކުރި އާއި މިހާރުގެ މޯލްޑިވްސް މީޑިއާ ކައުންސިލު (އެމްއެމްސީ) ގެ މެންބަރުން ވެސް ހިމެނެ އެވެ.
މީޑިއާތަކާއި ވަކިވަކި ނޫސްވެރިންނަށް ބޮޑެތި ފިޔަވަޅުތަކެއް އެޅޭ ގޮތަށް ވެސް ހިމަނާފައިވާ އެ ބިލުގައިވާ ގޮތުން، މީޑިއާ ކޮމިޝަނުން އެކުލަވާލާ ސުލޫކީ މިންގަނޑާ ޚިލާފުވާ ނޫސްވެރިންނާއި މީޑިއާތައް ބޮޑު އަދަދަކުން ޖޫރިމަނާކޮށް، ރަޖިސްޓްރީ ވެސް ބާތިލްކުރެވޭނެއެވެ. ވަކިވަކި ނޫސްވެރިން 5،000 ރުފިޔާއާއި 25،000 ރުފިޔާއާ ދެމެދު ޖޫރިމަނާ ކުރެވޭ އިރު، މީޑިއާތައް 100،000 ރުފިޔާއާ ހަމައަށް ޖޫރިމަނާ ކުރެވޭނެހެންވެސް ފަރުމާ ކޮށްފައިވާ މި ބިލަކީ މަޖިލީހުގެ ނައިބު ރައީސް އަހުމަދު ނާޒިމު އިސްވެ ހުންނަވާ ކުރެއްވި މަސައްކަތުން ތުޅާދޫ ދާއިރާގެ މެމްބަރު އބްދުލް ހަންނާނު އަބޫބަކުރު ހުށަހެޅުއްވި ބިލެއް ކަމަށް ނާޒިމް އިއުތިރާފުވެފައިވެއެވެ.
