މަޖިލީހުގެ މެޖޯރިޓީގައި ތިބީ ބިލަކަށް ޢިލްމީ ބަހުސް ކުރަން ނޭގޭ މެންބަރުން ކަމަށް ޕީއެންއެފްގެ ސެކްރެޓަރީ ޖެނެރަލް މުހައްމަދު މަލީހް ޖަމާލް ވިދާޅުވެއްޖެއެވެ.
މީޑިއާ ކޮންޓްރޯލް ކުރުމުގެ ބިލު ސަރުކާރުގެ ނުފޫޒާއި އެކު ތުޅާދޫ މެންބަރު މަޖިލީހަށް ހުށަހަޅާފައިވާއިރު މި ބިލާއި ގުޅިގެން ޕޯސްޓް ކުރައްވާ މަލީހް ވިދާޅުވީ މިހާރު މަޖިލީހުގެ ތެރެއިން ފެނިގެންދަނީ ތަންދޮރު ނޭގޭ ގަމާރުން މެންބަރު ކަމަށް އައްޔަން ކުރީމާ ފެންނާނެ މަންޒަރު ކަމަށެވެ.
ސުޕަ މެޖޯރިޓީގައި ގިނައިން ތިއްބެވީ ލިޔަން ކިޔަން ނޭގޭ ބޭފުޅުން ކަމަށް ވިދާޅުވެ މަލީހް ވަނީ ސަރުކާރަށާއި މި ބިލަށް ތާއީދު ކުރައްވާ މެންބަރުންނަށް ފާޑުވިދާޅުވެފައެވެ.
މީގެ އިތުރުން، ށ.މިލަންދޫ ދާއިރާގެ މެންބަރު މި ބިލަށް ބަހުސް ކުރައްވަމުން އިސްލާމްދީނުގެ އަސާސްތަކުގެ މަތިން ހަނދުމަނެތި ކުރާ ކޮންމެ ކަމެއް ކުރުން އެއީ ލާޒިމުކަމެއްގެ ގޮތުގައި ވިދާޅުވަމުން މަލީހް ވަނީ ނުސީދާކޮށް އެކަމަށް ފާޑުވިދާޅުވެ ޢިލްމީ ބަހުސްއެއް ކުރުމުގެ ގާބިލުކަން ސަރުކާރުގެ މެންބަރުންނަށް ނޭގޭ ކަމަށް ވިދާޅުވެފައެވެ.
މީޑިއާ ކޮންޓްރޯލް ބިލު އަނބުރާ ގެންދިޔުމަށް މަޖިލިސް އިދާރާގެ ކުރިމަތީގައި ގިނަ އަދަދެއްގެ ބަޔަކު އަންނަނީ އިހުތިޖާޖު ކުރަމުންނެވެ.
