އަމީނީމަގުގެ ފަހު 2 ސެގްމެންޓުގެ ތެރެއިން ބައެއް އާންމުންނަށް ބޭނުން ކުރެވޭހެން ހުޅުވާލައިފިއެވެ.

އާންމުނަށް ބޭނުން ކުރެވޭހެން ހުޅުވާލެވިފައިވަނީ އިއްޒުއްދީންމަގާއި ގުޅޭ ޖަންކްޝަނާއި، ކަނބާ އައިސަރަނި ހިނގުމާއި އެ މަގު ގުޅޭ ޖަންކްޝަނެވެ. މި ދެ ސަރަހައްދު އާންމުންނަށް ހުޅުވާލެވިފައިވަނީ ބުދަ ދުވަހު ހެނދުނު 6 ޖެހި އިިރުއެވެ.

ނިމިދިޔަ ސަރުކާރުން 2022 ވަނަ އަހަރު ރޯޑް ޑިވެލޮޕްމެންޓް ކޮމްޕެނީ- އާްރްޑީސީއާއި ހަވާލުކޮށްގެން ފެށި އަމީނީ މަގު ޒަމާނީ ފެންވަރަށް ތަރައްގީ ކުރުމުގެ މަސައްކަތް ވަނީ ރިޔާސީ އިންތިޚާބާއި ގުޅިގެން ވަގުތީގޮތުން މެދުކަނޑާލާފައިއެވެ.

13 ސެގްމަންޓަކަށް ބަހާލައިގެން ކުރިއަށް ގެންދާ އަމީނީ މަގުގެ މަސައްކަތުގެ ބާކީ އޮތް ދެ ސެގްމެންޓުގެ މަސައްކަތް މި ސަރުކާރުން ޑިސެމްބަރު 9 ވަނަ ދުވަހު ވަނީ އަލުން ފަށާފައިއެވެ.

އަމީނީމަގު ފަހު 2 ސެގްމަންޓުގައި ތާރުއެޅުމުގެ މަސައްކަތް ނިމިފައިވާއިރު މިހާރު އެ ކުންފުނިން ދަނީ މަގުތަކުގައި ކުރަހަންޖެހޭ ޓްރެފިކް ނިޝާންތައް ކުރެހުމުގެ މަސައްކަތް ކުރަމުންނެވެ.

އިތުރުން އަމީނީމަގުގެ ސެގްމަންޓް 12 އަދި 13 އާންމުންނަށް އަންނަ ހޮނިހިރު ދުވަހުން ފެށިގެން ހުޅުވާލަން ވަނީ ހަމަޖެހިފައިއެވެ.

އަމީނީމަގުގެ 13 ސެގްމެންޓު ޒަމާނީ ފެންވަރަށް ތަރައްގީ ކުރުމަށް މަސައްކަތަށް 84.4 މިލިއަން ރުފިޔާ ހަރަދުކޮށްފައިވެއެވެ.