ނޫސްވެރިންނަށް އަނިޔާވެރި ގޮތަކަށް މަރުގެ އަދަބު ދިނުމަށް ރައްޔިތުންގެ މަޖިލީހުގެ އިނގުރައިދޫ ދާއިރާގެ މެމްބަރު އަދި ޕީއެންސީގެ ޕީޖީ ލީޑަރު އިބްރާހިމް ފަލާހު ގޮވާލެއްވި މައްސަލައިގައި ކުރީގެ ނައިބު ރައީސް އަދި ރައީސް ޔާމީންގެ އިސް ގާނޫނީ ވަކީލު ޑރ މުހައްމަދު ޖަމީލްގެ ފާޑުކިޔުން ފަލާހަށާއި މުއިއްޒަށް އަމާޒުކޮށްފިއެވެ.

ޑރ ޖަމީލް އެކްސްގައި ކުރެއްވި ޕޯސްޓެއްގައި ވިދާޅުވީ މުއިއްޒުގެ އަރިސް ބޭފުޅުން ދައްކަވަމުން އެ ގެންދަވަނީ ސީދާ މުއިއްޒުގެ ވިސްނުން ހުރި ގޮތް ކަމަށާއި ފަލާހްގެ މި ވާހަކަތަކަކީ ވަރަށް ދަށު ދަރަޖައިގެ ޖާހިލު ވާހަކަތަކެއް ކަމަށެވެ.

ނޫސްވެރިން "މަރަން" ފަލާހް ގޮވާލާފައިވާއިރު، ފަލާހް ނިސްބަތްވާ ޕީއެންސީއަކުން މި ވާހަކަތައް ކުށްވެރިކޮށް އެއްވެސް ބަޔާނެއް ނުވަތަ މައުލޫމާތެއް ހާމަކޮށްފައިނުވެއެވެ. އަދި މުއިއްޒުވެސް މި ކަމާއި ގުޅިގެން އެއްވެސް ވާހަކައެއް ނުދެއްކުމަކީ މިއީ ސީދާ މުއިއްޒުގެވެސް ވިސްނުން ހުރި ގޮތް ކަމަށްވާތީ ކަމަށް ޖަމީލް ސިފަކުރެއްވިއެވެ.

މީގެ އިތުރުން، މުއިއްޒު ވެރިކަން ހޯދުމަށް ދެއްކި "މާތް" މޫނުގެ ފަހަތުގައި ވާ އަނިޔާވެރިކަން ދިވެހި ރައްޔިތުންނަށް މިހާރު ކަޝްފުވެފައިވާ ކަމަށާއި މިހާރު ފެނިގެންދަނީ މުއިއްޒުގެ އަސްލު ސޫރަ ކަމުގައި ޖަމީލް ވަނީ ވިދާޅުވެފައެވެ.

މިއާއި އެކު ބާރަކީ އަބަދުވެސް ރައްޔިތުންގެ އަތް މަތީގައި އޮންނަ އެއްޗެއްކަން ހަނދާންކޮށްދެއްވާ ޖަމީލް ވިދާޅުވީ ވެރިކަމަށްވެސް ނިމުން އަންނާނެ ކަމަށާއި ރައްޔިތުންނަށް ޖައްސާ ނިކަމެތި ހާލު އަދި އެބޭފުޅުން ދެކޭނެ ކަމަށެވެ.