މިއަދު ލިބޭ މަދު ފައިސާކޮޅެއްގެ ދަހިެތިކަމުގައި ރައްޔިތުންގެ މަޖިޅިހުގައި ތިބެ ވަކި ބަޔަކު މިނިވަން ނޫސްވެރިކަމުގައި ތަޅުއަޅުވާ ދޫ ބަންދުކުރަން އުޅޭ އުޅުމުގެ ހިތި ފަހުން ފެންނާނެ ކަމަށް ވެލިދޫ ދާއިރާގެ މެމްބަރު މުހައްމަދު އައްބާސް ވިދާޅުވެއްޖެއެވެ.

އެކްސްގައި ކުރެއްވި ޕޯސްޓެއްގައި އައްބާސް ވިދާޅުވީ މީޑިޔާ ރެގިއުލޭޓުކުރުމުގެ ނަމުގައި ބިލެއް ހުށަހަޅައިގެން އުޅެނީ ރައްޔިތުންގެ ޓެކުސް ފައިސާއިން ދައުލަތުގެ ވެރިން ވައްކަން ކުރަތީ އެ ވާހަކަ ދއްކާތީ ކަމަށާ ނަމަވެސް އެ ވާހަކަ ދައްކާނެ ކަމަށެވެ.

އައްބާސް ތުހުމަތު ކުރައްވާފައިވާ ގޮތުގައި ވެރިކަމަށް ދެ އަހަރު ވެގެންދާއިރު ގައުމަށް އެެއްވެސް މިންވަރެއްގެ ތަރައްގީ ނުގެނެވިގެން އުޅެނީ ބަޖެޓުން، ރައްޔިތުންގެ ޓެކުސް ފައިސާއިން ދައުލަތުގެ ވެރިން އިންތިހާ ދަރަޖައަށް ވައްކަން ކުރުމުން ކަމަށެވެ.

މިހުރިހާ ވައްކަންތަކެއް ކުރަމުން ދަނީ ހުރިހާ ފަރާތްތަކެއް ވަރަށް ބޮޑަށް ގުޅިގެން ރޭވިގެން ކަމަށް ވިދާޅުވެ އައްބާސް ވިދާޅުވީ، މިކަން ކަން ބަލާނެ ދައުލަތުގެ އެއްވެސް މިނިވަން މުއައްސަސާއެއް މިނިވަން ކަންމަތީގައި އޮތް މަންޒަރު ނުފެންނަ ކަމަށާ، ކޮންމެ ސަރުކާރުކާރެއް އޮތަސް ބޮޑެތި ހިޔާނާތްތައް ރައްޔިތުންނާ ހަމައަށް ތިލަކޮށްދެމުން ދިޔައީ އަދި ތިލަކޮށްދީފައި ވަނީ ޑިމޮކްރަސީގެ 4 ވަނަ ބާރު ކަމުގައިވާ ނޫސްވެރިންނާއި މީޑިއާތައް ކަމަށެވެ.

އެހެންކަމުން މިއަދު ވިސްނާނުލާ މަދު ފައިސާކޮޅެއްގެ ދަހިވެތިކަމުގައި ނޫސްވެރިންނާއި މީޑިއާތަކުގެ މިނިވަންކަން ނަގާލާ އެބައިމީހުންގެ ދޫ ބަންދުކޮށް އަނދަގޮޑި ޖެހީމައި ހުރިހާ ގެއްލުމެއް ލިބިގެންދާނީ ރައްޔިޔުންނަށް ކަމަށް ވިދާޅުވެ އައްބާސް ވަނީ އިތުރަށް ޤައުމު ދަރަނިވެރިވެ ބިކަވެގެން ދާނީ ދިވެހި ރައްޔިތުން ކަމަށް ވިދާޅުވެފައެވެ.

އައްބާސް މިފަދައިން ވިދާޅުވެފައިވާއިރު، މީޑިޔާ ބިލު ބޭރު ކުރުމުގެ ވިސްނުން ސަރުކާރުގައި ނެތްކަމަށް އޭޖީ ވަނީ ވިދާޅުވެފައެވެ. މިނިވަން މެމްބަރެއްގެ ހިޔަނީގައި ތިބެ ސަރުކާރުން ހުށަހެޅި ބިލުގައި ނޫސްވެރިން ކަންބޮޑުވާ ގިނަ ކަންކަން ހުރި އިރު މި ސަރުކާރުގެ ޔޫތު މިނިސްޓަރު ވެސް ވަނީ ބިލު އޮތްގޮތަށް ފާސްކުރުން ރަގަޅު ނޫން ކަމަށް ވިދާޅުވެފައެވެ.