ކޮރަޕްޝަންގެ މައްސަލަތައް ގިނަވެ އެވާހަކަތައް މިވަރަށް ދައްކާއިރު އެކަަމަށް ފިޔަވަޅު އެޅުމަކީ ފުލުހުން ކުރަން ޖެހޭނެ ކަމެއް ކަމަށް ރައީސް އަބްދުﷲ ޔާމީން އަބްދުލްގައްޔޫމް ވިދާޅުވެއްޖެއެވެ.

ޕީއެންއެފްގެ ޓައުން ހޯލް ޖަލްސާގައި ރޭ ވާހަކަފުޅު ދައްކަވަމުން ރައީސް ޔާމީން ވިދާޅުވީ ސަރުކާރުގެ ކުންފުނިތަކުގެ ވެރިން ހިންގާފައިވާ ކޮރަޕްޝަންތަކުގެ ވާހަކަތައް ފެންމަތިވެފައިވާއިރު އެންޓި ކޮރަޕްޝަން ކޮމިޝަނެއް އުފައްދާ އެ ކޮމިޝަނުން މިފަދަ މައްސަލަތައް ބަލާތޯ ނުބަލާތޯ ފުލުހުން ބަލަން ނުޖެހޭ ކަމަށާއި މިފަދަ މައްސަލަތައް ފުލުހުން ބަލަން ޖެހޭތޯ ޕީޖީއާއި މަޝްވަރާކުރަން ނުޖެހޭނެ ކަމަށް ރައީސް ޔާމީން ވިދާޅުވިއެވެ.

މިފަދަ މައްސަލަތައް ބެލުމަކީ ގާނޫނުގެ މަތިން ފުލުހުންގެ ޒިންމާއެއް ކަމަށް ރައީސް ޔާމީން ވަނީ ފުލުހުންގެ ވެރިންނަށް ހަނދާންކޮށްދީފައެވެ.

މީގެ އިތުރުން، ދިވެހި ރައްޔިތުންނަށް އިންސާފު މި ގައުމުގައި ދެވޭ ތަން ފެންނަން ޖެހޭ ކަމަށާއި މިފަދަ ވައްކަމާއި ކޮރަޕްޝަންގެ ވާހަކަތައް ތިލަވާއިރު ފުލުހުން އިސްނަގައިގެން ތަހުގީގު ނުކުރާތީ މި ގައުމުގައި އިންސާފު ލިބޭނެ ކަމަށް ރައްޔިތުން ގަބޫލުނުކުރާނެ ކަމަށްވެސް ރައީސް ޔާމީން ވިދާޅުވިއެވެ.

ގައުމުގައި ހިނގާ މިފަދަ މައްސަލަތައް ހައްލުކޮށް އަދަބު ދޭން ޖެހޭ ފަރާތްތަކަށް ހައްގު އަދަބު ދިނުމަކީ ފުލުހުންގެ މައްޗަށް ދިވެހި ރައްޔިތުން ކުރާ އިތުބާރު ބޮޑުވެ ފުލުހުންނަށް ތަރުހީބު ލިބޭނެ ކަމެއް ކަމަށްވެސް އެމަނިކުފާނު ވަނީ ފާހަގަކުރައްވާފައެވެ.