އަތޮޅު ކައުންސިލްތައް އުވާލުމަށް ރައީސް މުޢިއްޒު ނިންމަވާފައިވާ ނިންމެވުމާ ގުޅިގެން، އެކަމާ ދެކޮޅަށް، އެހެން އަތޮޅުތަކުގެ ކައުންސިލްތަކާ ގުޅިގެން ހިތްހަމަނުޖެހުން ފާޅުކުރުމަށް މުޒާހަރާ ކުރިއަށް ގެންދިއުމަށް ބ. އަތޮޅު ކައުންސިލުން ނިންމައިފިއެވެ.

އެ ކައުންސިލްގެ ހަތަރު ވަނަ ދައުރުގެ 83 ވަނަ އާންމު ބައްދަލުވުމުގައި އެ ކައުންސިލުން ވަނީ މި މައްސަލަ ސުޕްރީމް ކޯޓަށް ހުށަހެޅުމަށާއި، ރައްޔިތުންގެ މަޖިލީހަށް ގޮވާލާ ބަޔާނެއް ނެރުމަށްވެސް ނިންމާފައެވެ.

މުޢިއްޒު ވަނީ ކުރިއަށް އޮތް ލޯކަލް ކައުންސިލް އިންތިޚާބުގެ ކުރިން އަތޮޅު ކައުންސިލްތައް އުވާލުމަށް ޤާނޫނުއަސާސީ އިޞްލާޙު ކުރައްވާނެ ކަމަށް ވިދާޅުވެފައެވެ. އަދި އަތޮޅު ކައުންސިލްތަކަކީ ލާމަރުކަޒީ ނިޒާމުގެ ތެރޭގައި ހިމެނޭ ބޭކާރު ފަށަލައެއް ކަމަށްވެސް މުއިއްޒު ވިދާޅުވެފައިވެއެވެ.

މީގެ އިތުރުން، އަތޮޅު ކައުންސިލްތަކަކީ ބޭކާރު ބައެއް ކަން ކޮންމެ ރަށެއްގެ ރަށު ކައުންސިލުން އެއްބަސްވާނެ ކަަމަށްވެސް މުއިއްޒު ވަނީ ވިދާޅުވެފައެވެ.

އަތޮޅު ކައުންސިލުތައް އުވާލުމަށް މުއިއްޒު ނިންމެވުމާއި ގުޅިގެން ގިނަ އަތޮޅު ކައުންސިލުތަކުން އަންނަނީ ހިތްހަމަނުޖެހުން ފާޅުކުރަމުންނެވެ.